نۇرسۇلتان نازاربايەۆ جۇڭگو حالىق رەسپۋبليكاسىنىڭ سىرتقى ىستەر ءمينيسترى ۆان يمەن كەزدەستى، دەپ حابارلادى ەلباسى رەسمي سايتى.

كەزدەسۋدە نۇرسۇلتان نازاربايەۆ قازاقستاندا قىتايمەن دوستىقتى جوعارى باعالايتىنىن اتاپ ءوتتى.

– ءبىز تاتۋ كورشىلىك، دوستىق جانە ىنتىماقتاستىق تۋرالى شارتقا قول قويدىق، شەكارا ماسەلەسىن تولىق شەشتىك. ءبىزدىڭ قارىم-قاتىناسىمىزدا ەشقانداي تۇيتكىل بولعان جوق، ءارى قاراي دا سولاي جالعاسۋى كەرەك. قازاقستان قىتايدىڭ ءبىراز باستامالارىن قولدايدى. سونىڭ ءبىرى — "ءبىر بەلدەۋ، ءبىر جول" باعدارلاماسىنىڭ جۇزەگە اسۋى. ونى  جۇڭگو ءتوراعاسى سي سزينپين قازاقستان جەرىندە جاريالاعان بولاتىن. ءبىز تالاي شارۋا اتقاردىق، ءالى دە كوپ جوبالار بويىنشا جۇمىس جۇرگىزىلۋدە، – دەدى ەلباسى.

جۇڭگو حالىق رەسپۋبليكاسىنىڭ سىرتقى ىستەر ءمينيسترى قازاقستاننىڭ جەتىستىكتەرىنە توقتالىپ، نۇرسۇلتان نازاربايەۆقا ەكى ەل اراسىنداعى جان-جاقتى قاتىناستى دامىتۋعا قوسقان زور ۇلەسى ءۇشىن العىس ايتتى. ۆان ي قازاقستان-قىتاي ىنتىماقتاستىعىنىڭ ءارى قاراي دا تەرەڭدەي بەرەتىنىنە سەنىم ءبىلدىردى.

– جاقىندا قازاقستان ءوز تاۋەلسىزدىگىنىڭ 30 جىلدىعىن اتاپ وتەدى. ءسىز وعان قول جەتكىزۋدىڭ باستاۋىندا تۇردىڭىز. وسى جىلدار ىشىندەگى قازاقستاننىڭ تابىستى دامۋى ءبارىمىزدى ءتانتى ەتەدى. وسى جەتىستىكتىڭ بارىنە ءسىزدىڭ ارقاڭىزدا قول جەتكىزىلدى. ءسىزدىڭ جەتەكشىلىگىڭىزبەن قازاقستان وسىپ-وركەندەدى. ءوز ەلىڭىز ءۇشىن جانە ءبىزدىڭ مەملەكەتتەرىمىزدىڭ اراسىنداعى تاتۋ كورشىلىك قاتىناستاردى دامىتۋ ءۇشىن ءبىراز شارۋا اتقاردىڭىز. جۇڭگو حالقىنىڭ ءسىز سياقتى سەنىمدى دوسى بار. "ءبىر بەلدەۋ، ءبىر جول" باستاماسى ءدال وسى جەردە – قازاقستاننىڭ استاناسىندا باستاۋ العانىن ەشقاشان ۇمىتپايمىز، – دەدى ۆان ي.

جۇڭگو حالىق رەسپۋبليكاسىنىڭ سىرتقى ىستەر ءمينيسترى نۇرسۇلتان نازاربايەۆقا جۇڭگو ءتوراعاسى سي ءسزينپيننىڭ اۋىزشا ىستىق سالەمىن جەتكىزدى. وندا جۇڭگو ءتوراعاسى ەلباسىنى كەز كەلگەن ىڭعايلى ۋاقىتتا قىتايعا ساپارمەن كەلۋگە شاقىردى. شانحاي ىنتىماقتاستىق ۇيىمىنا مۇشە ەلدەردىڭ سىرتقى ىستەر مينيسترلەرى كەڭەسىنىڭ وتكەن وتىرىسى تۋرالى ايتىپ بەردى. ۆان ي وسى جىلدار ىشىندە قازاقستان شانحاي ىنتىماقتاستىق ۇيىمىنا ەڭ بەلسەندى قاتىسۋشىلاردىڭ ءبىرى عانا ەمەس، سونداي-اق كوپتەگەن يدەيالارعا، جوبالار مەن باعدارلامالارعا باستاماشى بولعانىن اتاپ ءوتتى.

ءوز كەزەگىندە قازاقستاننىڭ تۇڭعىش پرەزيدەنتى جۇڭگو ءتوراعاسىنا ىزگى تىلەگىن جولدادى. سونداي-اق شىۇ جانە "ءبىر بەلدەۋ، ءبىر جول" جوباسىنىڭ ماڭىزدىلىعى تۋرالى پىكىرىن ءبىلدىردى.

– سي سزينپينگە جىلى لەبىزى ءۇشىن العىسىم شەكسىز. مەن شىۇ قۇرىلۋىنىڭ باستاۋىندا بولدىم. ۇيىمدى ساقتاۋ جانە ودان ءارى دامىتۋ كەرەك دەپ سانايمىن. جاھاندانۋعا قاتەر ءتونىپ تۇرعان قازىرگى كەزدە شىۇ جانە "ءبىر بەلدەۋ، ءبىر جول" ينتەگراسيا يدەياسىن ۇستاناتىن كوپتەگەن حالىقتار ءۇشىن تىعىرىقتان شىعۋدىڭ جولى بولىپ وتىر، — دەدى نۇرسۇلتان نازاربايەۆ.