الماتىدا Bank RBK-دان 144 ميلليارد تەڭگە جىمقىرۋ ىسىنە قاتىستى سوت وتىرىسى اياقتالدى. پروكۋرور ەكس-بانكير جومارت ەرتايەۆقا 11 جىل باس بوستاندىعىنان ايىرۋ جازاسىن سۇرادى. بۇل تۋرالى المالى اۋداندىق سوتىنىڭ باسپا ءسوز قىزمەتى حابارلادى.

"پروكۋرور اسا اۋىر ەمەس جازا مەن اسا اۋىر جازانى بىرىكتىرۋ ارقىلى 11 جىل باس بوستاندىعىنان ايىرۋ جازاسىن سۇرادى. ونىمەن قوسا مۇلكىن تاركىلەۋ، 5 جىل ماتەريالدىق جاۋاپكەرشىلىكپەن بايلانىستى كوممەرسيالىق جانە قارجى قىزمەتىنەن اينالىسۋ قۇقىنان ايىرۋ، جازاسىن ورتاشا قاۋىپسىزدىكتەگى قىلمىستىق-اتقارۋ جۇيەسى مەكەمەسىندە جازاسىن وتەۋدى تالاپ ەتتى" دەدى سوتتاعىلار.

Bank RBK باسقارماسىنىڭ ەكس-باسشىسى يگور ماجينوۆ جانە مارپۋ جاقىبايەۆا، سونداي-اق Qazaq bankiء-نىڭ بۇرىنعى اكسيونەرى باقىت يبراگيمگە قاتىستى مەملەكەتتىك ايىپتاۋ 8 جىل باس بوستاندىعىنان ايىرۋ جازاسىن سۇرادى.    

مارپۋ جاقىبايەۆا 2011 جانە 2015 جىلدار ارالىعىندا Bank RBK باسشىلىعىنان بونۋس رەتىندە العان 100،2 ميلليون تەڭگەسىن زارداپ شەككەن تاراپقا قايتارعان كورىنەدى. يگور ماجينوۆ تە 37،2 ميلليون تەڭگەنىڭ ورنىن تولتىردى. ال باقىت يبراگيم كىناسىن مويىنداپ، قىلمىستىق ءىستى تەرگەۋگە كومەكتەستى دە،17،3 ميلليارد تەڭگەنىڭ شىعىنىن وتەدى.

بۇل ءىس بويىنشا 37 ادامعا قاتىستى سوت پروسەسى ءجۇردى. پروكۋرور سولاردىڭ 36-سىن كىنالى دەپ تانۋدى سۇرادى. جاۋاپقا تارتىلعان ءبىر ادام قايتىس بولعان.

Bank RBK-ىنەن 144 ميلليارد تەڭگە جىمقىرۋ ىسىنە قاتىستى سوت وتكەن جىلدىڭ اياعىندا باستالعان. تەرگەۋ دەرەكتەرىنە سۇيەنسەك، قىلمىس 2011-2017 جىلدار ارالىعىندا جاسالعان. قىلمىستىق ءىس 46 ەپيزود جانە 700 تومنان تۇرادى. ايىپتاۋ اكتىسىندە 3600-دان اسا پاراقشا بار.