"Nur Otan" ءار ءوڭىر، قالا جانە اۋدان بويىنشا 216 سايلاۋالدى باعدارلاماسىنىڭ جوبالارىن جاريالاۋدى جالعاستىرۋدا. بۇگىن بيلەۋشى پارتيادا الداعى 5 جىلدا قاراعاندى جانە شىعىس قازاقستان وبلىستارىنىڭ تۇرعىندارىن قانداي وزگەرىستەر كۇتىپ تۇرعانى ايتىلدى.

 سونىمەن، پارتيانىڭ شىعىس قازاقستان وبلىسى بويىنشا سايلاۋالدى باعدارلاماسىنىڭ جوباسىندا 2025 جىلعا دەيىن وڭىردە شامامەن 130 مىڭ جۇمىس ورنىن قۇرۋ جانە ورتاشا جالاقىنى 202 مىڭ تەڭگەگە دەيىن ارتتىرۋ مىندەتى قويىلعان. بۇل رەتتە «Nur Otan» ەڭبەك نارىعىنىڭ قاجەتتىلىكتەرىن ەسكەرە وتىرىپ، 1،5 مىڭ ادامدى جىل سايىن قايتا دايارلاۋعا ىقپال ەتۋدى جوسپارلاپ وتىر.

شارۋالارعا بارىنشا قولداۋ كورسەتۋ ءۇشىن پارتيا جىل سايىن 50-گە جۋىق ءتۇرلى ينۆەستيسيالىق جوبالاردى جۇزەگە اسىرۋدى ۇسىنادى. بۇل – ءسۇت-تاۋارلارىنىڭ فەرمالارىن سالۋ، بورداقىلاۋ الاڭدارىن قۇرۋ، اۋىل شارۋاشىلىعى تاۋار وندىرۋشىلەرىن جەڭىلدەتىلگەن نەسيەمەن قامتاماسىز ەتۋ جانە ت.ب.

ءوڭىردىڭ تۋريستىك الەۋەتىن ىسكە اسىرۋ ماقساتىندا الاكول كولىنىڭ جاعالاۋىن دامىتۋ، ءۇرجار اۋىلىنداعى اۋەجايدى قايتا جاڭارتۋ جانە بۇقتىرما سۋ قويماسى ارقىلى وتەتىن كوپىر سالۋ كوزدەلىپ وتىر.

اۆتوجولداردىڭ ساپاسىن كەزەڭ-كەزەڭمەن جاقسارتۋ ءۇشىن الداعى 5 جىلدا بارلىق اۋدانداردا 2،5 مىڭ شاقىرىم جولدى جانە 76 اۋىلداعى كوشەلەردى جوندەۋ جوسپارلانۋدا.

2025 جىلعا دەيىن پارتيا العاشقى مەديسينالىق-سانيتارلىق كومەك كورسەتەتىن مەديسينالىق ۇيىمداردىڭ 15 مينۋتتىق جەردە ورنالاسۋىن قامتاماسىز ەتۋ مىندەتىن قويادى. بۇل رەتتە پارتيا سەمەي قالاسىندا يادرولىق مەديسينا ورتالىعىن، گەماتولوگيا ورتالىعىن جانە وسكەمەن قالاسىندا 300 توسەكتىك كوپ بەيىندى اۋرۋحانانى، سونداي-اق ءۇرجار، كۇرشىم، تارباعاتاي اۋداندارىندا دارىگەرلىك امبۋلاتوريالار سالۋعا جاردەمدەسەتىن بولادى.

پارتيا ءوزىنىڭ سايلاۋالدى باعدارلاماسى اياسىندا بارلىق مۇقتاج بالالاردى 100% قامتي وتىرىپ، ينكليۋزيۆتى ءبىلىم بەرۋ ءۇشىن جاعداي جاساۋعا قول جەتكىزبەك. بالالار مەن جاستار اراسىندا بۇقارالىق سپورتتى دامىتۋ ءۇشىن پارتيا ءارتۇرلى ەلدى مەكەندەردە 11 دەنە شىنىقتىرۋ جانە ساۋىقتىرۋ كەشەندەرىن، 2 باسسەين، شاعىن سپورت الاڭدارىن، ستريتۆوركاۋتقا ارنالعان الاڭداردى جانە حوككەي كورتتارىن سالۋ ەسەبىنەن سپورتتىق ينفراقۇرىلىمدى كەڭەيتۋدى قولعا الادى.

يندۋستريالىق سەكتوردىڭ لوكوموتيۆى بولىپ تابىلاتىن قاراعاندى وبلىسىندا «Nur Otan» جىل سايىن كەمىندە 30 مىڭ جاڭا جۇمىس ورنىن اشۋ مىندەتىن قويىپ وتىر. سايلاۋالدى باعدارلامانىڭ جوباسى ونەركاسىپتى، قۇرىلىس سالاسىن، اۋىل شارۋاشىلىعىن، الەۋمەتتىك ينفراقۇرىلىمدى جانە ت. ب. ودان ءارى دامىتۋعا باعىتتالعان.

وڭىردە قورشاعان ورتاعا ۇلكەن اۋىرتپالىق بايقالاتىندىقتان، پارتيا اۋاعا لاستاۋشى زاتتاردىڭ ەميسسياسىن 560 مىڭ تونناعا دەيىن تومەندەتۋدى قامتاماسىز ەتۋ جانە قاتتى تۇرمىستىق قالدىقتاردى قايتا وڭدەۋ ۇلەسىن 2025 جىلعا قاراي 27%-عا دەيىن ۇلعايتۋدى ماقسات ەتىپ وتىر.

ول ءۇشىن الداعى بەس جىلدا «قازاقمىس» جانە «ارسەلور ميتتال» كاسىپورىندارىنداعى شاڭ جانە گاز ۇستاۋ جابدىقتارىن جاڭارتىپ، «سارىارقا» ماگيسترالدىق گاز قۇبىرىنا قوسىلۋ قاجەت. كەڭگىر كەنتىندە بيوەلەكتر ستانسياسىن، جاڭاارقا اۋدانىندا قوقىس سۇرىپتاۋ كەشەنىن، قاراعاندى قالاسىندا قوقىس جاعاتىن جانە قوقىس وڭدەيتىن زاۋىتتار سالۋ جوسپارلانۋدا. مەملەكەتتىك ورمان قورى اۋماعىندا دا، ونەركاسىپ كاسىپورىندارىندا دا جاسىل ايماقتاردىڭ اۋقىمى ۇلعايتىلاتىن بولادى.

سونىمەن قاتار، پارتيا قاراعاندى، بالقاش، قاراجال، تەمىرتاۋ، ساران جانە جاڭاارقا اۋدانىندا سۋ قۇبىرى جەلىلەرىن سالۋ مەن قايتا جاڭارتۋعا قول جەتكىزەتىن بولادى. بۇگىندە ولاردىڭ توزۋى 85%-دى قۇرايدى. 250 كوپپاتەرلى تۇرعىن ءۇي مەن 50 نىساندى ورتالىقتاندىرىلعان جىلۋ جۇيەسىنە قوسۋ ءۇشىن ورتالىق قازاندىقتىڭ قۇرىلىسىن اياقتاۋدى قامتاماسىز ەتۋ كوزدەلۋدە. «Nur Otan» 180 اۋىلدا سۋمەن جابدىقتاۋ نىساندارىن سالۋ جانە قايتا جوندەۋدەن وتكىزۋدى قولعا الماق.

سونداي-اق، 2025 جىلعا قاراي 30 مىڭ پاتەرگە جۋىق تۇرعىن ءۇي سالۋ جوسپارلانۋدا.

ءبىلىم بەرۋ سالاسىندا پارتيا مۇشەلەرى وبلىستىڭ 100 مىڭعا جۋىق وقۋشىسىنا تەگىن ىستىق تاماق بەرۋدى ۇيىمداستىرۋدى، قاراعاندى جانە قارقارالى قالالارىندا 4 ستۋدەنتتىك جاتاقحانانىڭ قۇرىلىسىن، سونداي-اق جەزقازعان قالاسىندا جاڭا بالاباقشالاردىڭ اشىلۋىن قامتاماسىز ەتپەك. بۇل ءوز كەزەگىندە 2025 جىلعا قاراي 1 جاستان 6 جاسقا دەيىنگى بالالاردى بالاباقشامەن قامتۋدى 100%-عا دەيىن ارتتىرۋعا مۇمكىندىك بەرەدى.

وڭىرلەردىڭ سايلاۋالدى باعدارلامالارىنىڭ جوبالارىمەن تولىعىراق primaries.kz سايتىنان تانىسۋعا بولادى. باسپا ءسوز قىزمەتى تاراتقان اقپاراتقا سايكەس، بۇل باعدارلامالار تۇپكىلىكتى ەمەس، ول كراۋدسورسينگ قاعيداتى بويىنشا حالىقتىڭ پىكىرىن ەسكەرە وتىرىپ پىسىقتالماق.