دەنساۋلىق ساقتاۋ مينيسترلىگىنىڭ رەسمي وكىلى باعدات قوجاحمەتوۆ Facebook الەۋمەتتىك جەلىسىندە دارىگەرلەردىڭ قىزمەتىن سىناعانداردى "اق حالاتتى جانداردى جامانداپ، اتىن شىعارعىسى كەلەتىندەر" دەپ اتادى.
"بورديۋرگە، اكىمگە، قوينىندا جاتقان ايەلىنە رەنجىسە دە ءوشىن اق حالاتتى ابزال جانداردان الادى. ولار اسا مەيىرىمدى جاندار ەمەس پا، بارىنە شىدايدى. مەدسەسترانى قازاق بەكەردەن مەيىربيكە دەمەيدى عوي. كۇندىز الەۋمەتتىك جەلىدە ونىڭ "بەتىنە تۇكىرىپ، تابان ءسۇرتىپ"، كەشكە جان قينالىپ اۋىرعاندا تۇك بولماعانداي ىڭقىلداپ سول دارىگەرگە بارىپ ەمدەلەتىندەر بار. ارامىزدا. مەنىڭ ارىپتەستەرىم جوق ەمەس ولاردىڭ ىشىندە" دەپ جازدى قوجاحمەتوۆ.
ول جازباسىندا دارىگەرلەر مەن اۋرۋحانانى "جامانداۋ" الەۋمەتتىك سانگە اينالعانىن، اتىن شىعارعىسى كەلگەندەر "مينزدراۆقا تيسەتىنىن" جەتكىزگەن.
"جالپى بىرەۋدى جامانداپ اتاق شىعاراتىندار كوبەيىپ كەتتى. بۇگىنگى كۇننىڭ الەۋمەتتىك سانىنە (موداسىنا) اينالعانى – دارىگەرلەردى، اۋىرۋحانالاردى، دەنميندى "تەپكىلەۋ"، جامانداۋ. ءوزىن ءوزى باتىر كورسەتىپ، اتىن شىعارعىسى كەلەتىندەر، سول باياعى مينزدراۆقا تيسەدى. چەللەندج سياقتى. جۇرتتان قالامىز با، دەپ.
اتام ايتۋشى ەدى: – "بىلگەن بوعىن جەسىن"، دەپ. ءبىراق ويىمدا جۇرگەنىن جەتكىزگىم كەلدى. ارينە، ءبىر دەمدە قوعام وزگەرىپ مادەنيەتىمىز ءوربىپ كەتپەيدى. ءبىراق ءار ادام ىستەگەنىنە، ويىمەن ايتقان سوزدەرىنە ءبىر كۇنى جاراتۋشىنىڭ الدىندا جاۋاپ بەرەدى. وعان كۇمانىم جوق.
سونىمەن قوسا ايتايىن دەگەنىم، ەمشىلەردىڭ نامىسىن قورعايتىندار ارامىزدا از ەمەس. سونىدا ءبىلىپ جۇرەيىك، دەگەنىم عوي" دەلىنگەن جازبادا.
كەي جۋرناليستەر مەن قوعام بەلسەندىلەرى قوجاحمەتوۆتىڭ سوزىمەن كەلىسپەي، ازاماتتاردىڭ دەنساۋلىق ساقتاۋ مينيسترلىگى مەن دارىگەرلەردى سىناۋىن "جامانداۋ" دەگەنىنە نارازىلىعىن جەتكىزىپ جاتىر.
جۋرناليست، "مۇنارا" گازەتىنىڭ باس رەداكتورى سەرىكبول حاسان "سىناۋ مەن جامانداۋ – ەكەۋى ەكى بولەك نارسە. بايقاۋىمشا، سىننىڭ كوپشىلىگى سويعا باعىتتالىپ وتىر. جالپى دارىگەرلەرگە ەمەس" دەپ جازدى.
جۋرناليستيكا جانە كينو زەرتتەۋشىسى مولديار ەرگەبەكوۆ قوعاممەن بۇلاي بايلانىس ورناتۋعا بولمايتىنىن اتاپ ءوتتى.
"دەنساۋلىق ساقتاۋ مينيستىرلىگىنىڭ باسپا ءسوز حاتشىسى ما، تۇسىنبەدىم، الايدا حالىقپەن بوق ارقىلى كوپىر ورناتىپ ءجۇر ەكەن. ول جاعى تۇسىنىكتى بولدى. سوزىندە دالەل دە، دايەك تە جوق. تاڭەرتەڭ ۇيقىسىنان تۇرعاندا، تۋالەتكە بارىپ كوپىر ورناتىپ وتىرعان كەزىندە جازا سالعان سياقتى. مەمقىزمەتكەرگە "جاراساتىن" پوست" دەلىنگەن جازبادا.
پىكىر قالدىرۋ