قاسىم-جومارت توقايەۆ 500 ادامعا ستاسيونارلىق مەديسينالىق جاردەم بەرۋگە ارنالعان جانە زاماناۋي قۇرىلعىلارمەن جابدىقتالعان پالاتالاردى ارالاپ كوردى.
مەملەكەت باسشىسىنا قالاداعى مەديسينالىق-دەموگرافيالىق احۋال جانە COVID-19 ىندەتىنە قارسى كۇرەسۋ ءۇشىن قابىلدانعان شارالار، سونداي-اق مەديسينالىق جەدەل جاردەم قىزمەتىنىڭ جۇمىسى جونىندە باياندالدى. پرەزيدەنت مەديسينا قىزمەتكەرلەرىمەن اڭگىمەلەسۋ بارىسىندا ۇلتتىق دەنساۋلىق ساقتاۋ سالاسىن ودان ءارى دامىتۋ، مەديسينالىق مەكەمەلەردى قاجەتتى قۇرىلعىلارمەن جابدىقتاۋ، توسەك-ورىن مەن ينفراقۇرىلىمدى جاڭارتۋ، سونداي-اق، دارىگەرلەردىڭ ەڭبەكاقىسىن ارتتىرۋ ماسەلەلەرىنە توقتالدى.
– 2023 جىلعا قاراي مەديسينا قىزمەتكەرلەرىنىڭ ەڭبەكاقىسىن بۇكىل ەكونوميكاداعى ورتاشا جالاقىدان ەكى ەسە جوعارى دەڭگەيگە جەتكىزۋ مىندەتى قويىلادى. العاشقى مەديسينالىق سانيتارلىق جاردەم بەرۋ ءىسىن دامىتۋعا باسا ءمان بەرىلەدى. وكىنىشكە قاراي، ءبىز بۇل سالاعا ۋاقىتىندا نازار اۋدارمادىق. ەپيدەميا مۇنداي ءىس-قيمىلداردىڭ قاتە ەكەنىن كورسەتتى. ءقازىر جىبەرگەن قاتەلىكتەرگە دۇرىس كوڭىل ءبولىپ، ولاردى تۇزەتۋىمىز كەرەك. ارينە، مەديسينا ءاردايىم باستى نازارىمىزدا بولادى، – دەدى قاسىم-جومارت توقايەۆ.
مەملەكەت باسشىسى كوروناۆيرۋستىڭ ىقتيمال جاڭا تولقىنىنا دايىن بولۋدىڭ ماڭىزدى ەكەنىن اتاپ ءوتتى. وسى رەتتە ازاماتتارىمىزدىڭ ءومىرى مەن دەنساۋلىعىن ساقتاۋ ءۇشىن بارلىق رەسۋرستى جۇمىلدىرۋ قاجەتتىگىن ايتتى.
– ءقازىر بۇكىل الەمدەگى جاعداي كۇردەلى. ەۋروپا مەن امەريكادا كوروناۆيرۋستىڭ ەكىنشى تولقىنى ءوتىپ جاتىر. وسىنداي جاعدايدا ءبىز قىراعىلىق تانىتىپ، دايىن بولۋىمىز قاجەت. پاندەميانىڭ ءبىرىنشى تولقىنىنان جاقسى ساباق الدىق. بۇل تاجىريبەنىڭ پايداسى بولادى. ارينە، قيىن بولدى، قاتەلىكتەر جىبەرىلدى، سونىڭ ىشىندە، دەنساۋلىق ساقتاۋ مينيسترلىگى تاراپىنان دا اعاتتىقتار كەتتى. بۇل قاتەلىكتەردى جۇمىس بارىسىندا جوندەۋگە تۋرا كەلدى. دەگەنمەن، كەز كەلگەن تاجىريبەنىڭ، ءتىپتى اۋىر بولسا دا، پايداسى بار. سوندىقتان ەكىنشى تولقىنعا دايىن بولايىق. سودان كەيىن بۇكىل دۇنيە جۇزىمەن، حالىقارالىق قوعامداستىقپەن بىرگە بارلىق قيىندىقتى لايىقتى تۇردە ەڭسەرۋگە ءتيىسپىز، – دەدى پرەزيدەنت.
كەزدەسۋ ساڭىندا مەملەكەت باسشىسى پاندەمياعا قارسى كۇرەستىڭ كۇردەلى جاعدايىندا اتقارعان قاجىرلى ەڭبەكتەرى ءۇشىن دارىگەرلەرگە ريزاشىلىق ءبىلدىردى.
پىكىر قالدىرۋ