الماتى قالاسىنىڭ المالى اۋداندىق سوتىندا Bank RBK-دان 144 ميلليارد تەڭگە ۇرلادى دەگەن ايىپتالۋشىعا قاتىستى سوت وتىرىسى ءوتىپ جاتىر. ءىستىڭ باس فيگۋرانتى – بەلگىلى ەكس-بانكير جومارت ەرتايەۆ سوت زالىندا بارلىعى ءۇشىن كەشىرىم سۇرادى، دەپ حابارلادى Tengrinews.kz.

بۇعان دەيىن مەملەكەتتىك ايىپتاۋشى سوتتان ونى 11 جىل باس بوستاندىعىنان ايىرۋدى سۇراعان. سوتتالۋشى ءوزىنىڭ سوڭعى سوزىندە جاساعان قىلمىسىنا وكىنەتىنىن ايتتى. 

– بۇل ءىس مەن ءۇشىن 2017 جىلى باستالدى، ال 2018 جىلدىڭ 8 مامىرىنان باستاپ مەن قاماۋدا وتىرمىن. سودان بەرى كوپ ۋاقىت ءوتتى. ايتۋعا بولاتىن بارلىق نارسە ايتىلدى. ءبىز تەرگەۋگە جانە سىزگە، قۇرمەتتى سوتقا، وسى قيىن ءىستى تۇسىنۋگە كومەكتەسۋگە تىرىستىق. ءبىز مۇنى جاسادىق دەپ ۇمىتتەنەمىن جانە ءسىز بىرنەشە جىل بويى بولعان وقيعالاردىڭ ناقتى بەينەسىن كورە الدىڭىز.

مەنىڭ ويىمشا، سىزگە سوتتالۋشىلاردىڭ كوبىنىڭ بۇل ىسكە قاتىسى بار ەكەنى انىق. بۇل رەتتە مەنىڭ ءرولىمدى اسىرا باعالاۋ جانە اقتاپ الۋ قيىن. اقشا باقىت اكەلمەيدى. ناتيجەسىندە مەن ءبارىن جوعالتتىم: بوستاندىق، بەدەل، اقشا. ءالى قوعامدا كوپ جىلدار بويى "ەرتايەۆتىڭ قاتەسىن قايتالاماڭىز" دەپ ايتاتىن شىعار.

ارينە، مەن بۇعان لايىقپىن. ءوز مانسابىمنىڭ باسىندا مەن ءوزىمدى بايىتۋ مىندەتىن قويمادىم. مەن ءوزىمدى الەمدى جاقسى جاققا وزگەرتە الاتىن ميسسيونەر رەتىندە كوردىم. ءبىراق مەن ادەمى ومىرگە قۇمار بولدىم.

بوستاندىققا شىققاندا نەمەن اينالىسامىن؟ بۇل سۇراق ءاردايىم مەنىڭ ميىمدا تۇرادى. مەن ءوزىم ءۇشىن جابىرلەنۋشى تاراپپەن تۇپكىلىكتى ەسەپ ايىرىسىپ، ونىڭ تۋىستارى مەن دوستارىنا قامقورلىق جاساۋ ءۇشىن ءبارىن جاسايمىن دەپ شەشتىم.

سوڭعى ءسوز رەتىندە مەن بارىنەن، ەڭ الدىمەن تۋىستارىمنان جانە دوستارىمنان شىن جۇرەكتەن كەشىرىم سۇرايمىن. ءبىزدى، اقىماقتاردى كەشىرىڭىزدەر. ۇستامدىلىعى، قولداۋى جانە كاسىبيلىگى ءۇشىن قورعاۋشىما العىس ايتقىم كەلەدى.

قۇرمەتتى سوت، ادۆوكاتىم ەكەۋمىز سوتقا وڭ مىنەزدەمە بەرە المادىق. بۇل ءقازىر قانشالىقتى تاڭعالارلىق بولسا دا، وتكەن ومىرىمدە مەن شىنىمەن ماقتانا الاتىن كوپ نارسە بار. مەن جاھاندىق بيزنەس-جوبالاردى قۇرۋعا قاتىستىم، ءتورت كۇندىك جۇمىس اپتاسىن ەنگىزدىم، قايىرىمدىلىقپەن اينالىستىم. كەدەي وتباسىندا دۇنيەگە كەلدىم. ەدەن جۋىپ، قوي باعىپ، باراحولكادا جۇمىس ىستەدىم. 

انام مەنى پروتەستانتتىق ەتيكا رۋحىندا تاربيەلەدى، ونىڭ ءمانى قۇدايعا سەنۋ جانە ەڭبەك. مەن يەلىك ەتكەن نەمەسە باسقارعان كومپانيالار ءارقاشان ۇنەمى سالىق تولەيتىن. سانالى ومىرىمدە مەن 10 مىڭنان اسا جۇمىس ورنىن قۇرا الدىم. مەن ادال جولمەن اقشا تابا الامىن. مەن ءۇشىن ولار ءقازىر باستى ەمەس. ءقازىر تەك جابىرلەنۋشى تاراپپەن ەسەپ ايىرىسىپ، بالالارىمدى اياققا تۇرعىزىپ، باياندى ءومىر سۇرگىم كەلدى، – دەدى جومارت ەرتايەۆ سوڭعى سوزىندە.

Bank RBK-دان 144 ميلليارد تەڭگە جىمقىرۋ ىسىنە قاتىستى سوت وتكەن جىلدىڭ اياعىندا باستالعان. تەرگەۋ دەرەكتەرىنە سۇيەنسەك، قىلمىس 2011-2017 جىلدار ارالىعىندا جاسالعان. قىلمىستىق ءىس 46 ەپيزود جانە 700 تومنان تۇرادى. ايىپتاۋ اكتىسىندە 3600-دان اسا پاراقشا بار.