تۇركىستان وبلىسىنا ساپارى بارىسىندا تۇڭعىش پرەزيدەنت نۇرسۇلتان نازاربايەۆ تۇركىستان قالاسىنىڭ حالىقارالىق اۋەجايىنىڭ اشىلۋ سالتاناتىنا قاتىستى. بۇل تۋرالى يندۋستريا جانە ينفراقۇرىلىمدىق دامۋ مينيسترلىگىنىڭ رەسمي سايتى حابارلادى.
حالىقارالىق اۋەجايدىڭ قۇرىلىسى مەملەكەتتىك-جەكەمەنشىك سەرىكتەستىك اياسىندا جۇزەگە اسقان. قالادان 20 كم قاشىقتىقتا ورنالاسقان اۋەجاي حالىقارالىق ستاندارتتارعا ساي زاماناۋي تەحنولوگيالاردى قولدانا وتىرىپ سالىنعان.
اۋە ايلاعىن سالۋ ءۇشىن 102 بىرلىك ارنايى تەحنيكا مەن 300-دەن استام قۇرىلىسشى جۇمىلدىرىلدى. حالىقارالىق اۋەجايدىڭ جالپى اۋدانى 905 گا قۇرايدى. اۋەجايدىڭ قىزمەت كورسەتۋ الەۋەتى جىلىنا شامامەن 3 ميلليون جولاۋشىنى قۇرايدى.
تۇركىستان قالاسىنىڭ جاڭا حالىقارالىق اۋەجايىنان ءبىرىنشى كەزەڭدە قازاقستاندىق اۆياكومپانيالار نۇر-سۇلتان، الماتى قالالارىنا رەيستەر اشادى جانە ودان ءارى تۇركى الەمىنىڭ رۋحاني ورتالىعى رەتىندە تۇركىستان قازاقستاننىڭ باسقا دا وبلىس ورتالىقتارىمەن قوسىلاتىن بولادى.
باستاپقى كەزەڭدە Turkish Airlines اۆياكومپانياسى ستامبۋلعا رەيستەر اشۋدى جوسپارلاپ وتىر.
سونداي-اق، تۇركىستان قالاسىنىڭ اۋەجايى شەتەلدىك اۆياكومپانيالاردىڭ ۇشۋى ءۇشىن "اشىق اسپان" رەجيمىنە قوسىلاتىن بولادى، بۇل ونى ۇشۋ گەوگرافياسىن كەڭەيتۋ ءۇشىن تارتىمدى ەتەدى جانە شەتەلدىك تۋريستەر اعىنىن تارتۋعا ىقپال ەتەدى.
پىكىر قالدىرۋ