الماتى قالاسىنىڭ باس سانيتارلىق دارىگەرى ج.بەكشيننىڭ قاۋلىسىنا سايكەس، كارانتيننىڭ جەڭىلدەتىلۋىنە بايلانىستى 1 قىركۇيەكتەن باستاپ قالادا مۇراجايلار، كىتاپحانالار مەن حايۋاناتتار باعى قالىپتى رەجيمدە جۇمىس ىستەي باستادى.

«الماتى ق. مۋزەيلەر بىرلەستىگى» كمقك (الماتى مۇراجايى، ىقىلاس اتىنداعى ۇلتتىق اسپاپتار مۇراجايى، د. ا. قونايەۆ مۇراجايى، ن. تىلەندييەۆ اتىنداعى مەموريالدىق مۇراجاي، س. مۇقانوۆ جانە ع. مۇسىرەپوۆ اتىنداعى ادەبي-مەموريالدىق مۇراجاي كەشەنى، رايىمبەك باتىر ءداستۇرلى مۋزىكا مۋلتيمەديالىق مۇراجاي كەشەنى) كۇندەلىكتى 10:00–دەن 19:00–گە دەيىن جۇمىس ىستەيدى.

سونداي-اق، ىقىلاس اتىنداعى حالىق مۋزىكالىق اسپاپتار مۇراجايىندا ازيا جانە ەۋروپا مۋزىكالىق اسپاپتارىنىڭ جاڭا زالدارى اشىلعانىن حابارلايمىز.
كارانتين كەزىندە الماتى حايۋاناتتار باعىندا كەرىك، زەبرا، پرجيەۆالسكيي جىلقىسىنىڭ قۇلىنى، بۇعى، اقبوكەن، تۇيە، جاپون تىرناسى، ەمۋ تۇيەقۇسى جانە تاعى باسقالار دۇنيەگە كەلدى. ءار ءتۇرلى قۇستار مەن جانۋارلاردىڭ جۇزدەن استام بالاسى بار. بارلىق تولدەگەن جانۋارلار تولدەرىمەن بىرگە ەكسپوزيسيادا.

حايۋاناتتار باعى كۇندەلىكتى ساعات 9.00-دەن 19.00-گە دەيىن جۇمىسىن قايتا باستادى. كاسسالار بۇرىنعى جۇمىس كەستەسىنە ءبىر ساعات بۇرىن ەرتە جابىلادى.
قالالىق كىتاپحانالار دا ادەتتەگىدەي 9.00-دەن 20.00-گە دەيىن جۇمىس ىستەي باستادى.

سونداي-اق، كىتاپتاردى ۇيگە 15 كۇن الۋعا بولادى. ورتالىقتاندىرىلعان كىتاپحانا جۇيەسى ونلاين رەجيمىندە كوپتەگەن باسقا ءىس-شارالاردى وتكىزەدى. اتاپ ايتقاندا قازان ايىندا بالالار جازۋشىسى س. بەگاليننىڭ 125 جىلدىعىنا ارنالعان ونلاين رەجيمىندە حالىقارالىق كونفەرەنسيا وتكىزۋ جوسپارلانۋدا.
مادەني نىساندارعا كىرەتىن كەزدە قاتاڭ تۇردە الەۋمەتتىك قاشىقتىقتى جانە قورعانىس ماسكالارىن تاعىپ كىرۋ قاجەت.