بۇگىن، قالا كۇنى «قالانىڭ قۇرمەتتى ازاماتى» اتاعىن بەرۋ جانە «ەڭبەگى ءۇشىن» توسبەلگىسىن تابىستاۋ ءراسىمى ءوتتى.

الماتى اكىمى باقىتجان ساعىنتايەۆ ءوزىنىڭ Instagram پاراقشاسىندا قالا كۇنى ونىڭ قالىپتاسۋى مەن وسۋىنە ايرىقشا ۇلەس قوسقان قالالىقتاردىڭ ەڭبەگى اتالىپ وتەدى دەپ جازدى.

«بەلگىلى قوعام مەن ساياسي قايراتكەرلەرى، عىلىم مەن ءبىلىم، مەديسينا مەن مادەنيەت، كينو مەن ادەبيەت سالاسىنىڭ قىزمەتكەرلەرى قوعامعا قىزمەت ەتىپ قانا قويماي، ۇرپاقتار ساباقتاستىعىن قامتاماسىز ەتىپ، وسكەلەڭ ۇرپاق ءۇشىن ۇلگى بولۋدا»، — دەپ اتاپ ءوتتى ب. ساعىنتايەۆ.

مەگاپوليستىڭ بارلىق قوعامدىق-ساياسي ءومىرىنىڭ وكىلدەرىنە «قالانىڭ قۇرمەتتى ازاماتى» اتاعى بەرىلدى، سونىمەن قاتار «ەڭبەگى ءۇشىن» ءتوس بەلگىسىمەن ماراپاتتالدى. الماتى اكىمى قالا تۇرعىندارى اتىنان ولاردىڭ جۇمىستارىنا العىس ايتىپ، ريزاشىلىق ءبىلدىردى.

«قالانىڭ قۇرمەتتى ازاماتى» اتاعى ەكونوميكا عىلىمدارىنىڭ دوكتورى، الماتى قالاسى قوعامدىق كەڭەسىنىڭ ءتوراعاسى ر. الشانوۆقا؛ مەملەكەت جانە قوعام قايراتكەرى، III–V شاقىرىلىم ءماجىلىسىنىڭ دەپۋتاتى ت. اسانوۆقا؛ ءبىلىم بەرۋ ءىسىنىڭ قۇرمەتتى قىزمەتكەرى ش. بەركىمبايەۆاعا؛ مەملەكەت جانە قوعام قايراتكەرى، الماتى قالاسى ارداگەرلەر كەڭەسىنىڭ ءتوراعاسى ا. بيجانوۆقا؛ قازاقستاننىڭ حالىق ءارتىسى، اكتەر جانە كينورەجيسسەر د. جولساقىنوۆقا؛ قازاقستاننىڭ حالىق جازۋشىسى ق. جۇمادىلوۆكە؛ ەڭبەك سىڭىرگەن قايراتكەر، مەديسينا عىلىمدارىنىڭ دوكتورى ن. كايۋپوۆاعا؛ حالىق ءارتىسى، ەسترادا ءانشىسى ر. رىمبايەۆاعا؛ قالانىڭ باس رەانيماتولوگى ت. قۋاندىقوۆقا بەرىلدى.

قالانىڭ دامۋىنا قوسقان ۇلەسى ءۇشىن «ەڭبەگى ءۇشىن» توسبەلگىسىمەن پروديۋسەر ا. جۇماش؛ وقىتۋشى رينات يبرايموۆ؛ ساۋلەتشى، «ەوس» گرەكتەر قوعامى كەڭەسىنىڭ ءتوراعاسى س. كوسمەريدي، الماتى قالاسى پد اعا تەرگەۋشىسى ت. كالييەۆ، تسققد اۋداندىق باسقارماسىنىڭ ەپيدەميولوگيالىق ءبولىمىنىڭ باستىعى س. سۇلەيمەنوۆا ماراپاتتالدى.