Nur Otan پارتياسى ءتوراعاسىنىڭ ءبىرىنشى ورىنباسارى باۋىرجان بايبەك الماتى وبلىسىنا جاساعان جۇمىس ساپارى بارىسىندا تالدىقورعان قالاسىندا ءبىلىم بەرۋ سالاسىنىڭ قىزمەتكەرلەرىمەن كەزدەستى.

باۋىرجان بايبەك دۇنيەجۇزىلىك بانك ساراپشىلارىنىڭ دەرەگى بويىنشا، ساپالى بىلىمگە قولجەتىمدىلىكتىڭ تەڭسىزدىگى ادام كاپيتالىنىڭ دامۋىنا، اسىرەسە حالىقتىڭ الەۋمەتتىك ءالسىز توپتارىنا تەرىس اسەرىن تيگىزەتىنىن اتاپ ءوتتى. سوندىقتان كەزدەسۋدە پارتيانىڭ سايلاۋالدى باعدارلاماسىنىڭ جوباسى اياسىندا ءبىلىم سالاسىنىڭ وزەكتى ماسەلەلەرىن تالقىلاپ، ونىڭ ىشىندە پاندەميا كەزىندە قاشىقتان وقۋعا بايلانىستى جايتتەر دە ءسوز بولدى.

«قازىرگى ۋاقىتتا الماتى وبلىسىندا 38 ءۇش اۋىسىمدى مەكتەپ بار، ال 146 مەكتەپ – بەيىمدەلگەن عيماراتتاردا ورنالاستىرىلعان. «Nur Otan»-نىڭ وبلىستىق سايلاۋالدى جوباسىنا سايكەس ءۇش اۋىسىمدى وقۋدى جويۋ ءۇشىن 39 جاڭا مەكتەپ، 57 بەيىمدەلگەن عيماراتتىڭ ورنىنا 45 جاڭا مەكتەپ سالۋ، سونداي-اق 92 ءبىلىم بەرۋ نىسانىنا كۇردەلى جوندەۋ جۇرگىزۋ جوسپارلانۋدا»،- دەپ جازدى پارتيا ءتوراعاسىنىڭ ءبىرىنشى ورىنباسارى Facebook-تەگى پاراقشاسىندا.
ونىڭ ايتۋىنشا، وقۋ پروسەسىن سيفرلاندىرۋعا جانە اۋىلدىق جەرلەردە ينتەرنەت جەلىسىنە قولجەتىمدىلىك ماسەلەسىنە ەرەكشە نازار اۋدارىلاتىن بولادى.

«پارتيامىز مۇشەلەرىنىڭ ۇشتەن ءبىرى – ۇستازدار قاۋىمى. سوندىقتان ەلباسى، پارتيا ليدەرى ن.ءا. نازاربايەۆتىڭ باستاماسىمەن وتكەن جىلى پارتيانىڭ قولداۋىمەن «پەداگوگ مارتەبەسى تۋرالى» زاڭ قابىلداندى. ەل پرەزيدەنتى ق.ك. توقايەۆتىڭ تاپسىرماسى بويىنشا 1 قاڭتاردان باستاپ پەداگوگ قىزمەتكەرلەردىڭ ەڭبەكاقىسى 25%-عا وسەدى. مۇعالىمدەرىمىزدىڭ ەڭبەك ەتۋىنە قولايلى جاعداي جاساۋ، ولاردىڭ قۇقىقتارىن قورعاۋ پارتيامىزدىڭ ءاردايىم ەرەكشە باقىلاۋىندا بولادى»،- دەدى ول.

بۇدان سوڭ باۋىرجان بايبەك قاپشاعاي قالاسىنداعى «Green Land Alatau» ج ش س جىلىجاي كەشەنى قىزمەتكەرلەرىمەن كەزدەستى. بۇل – وڭىردەگى ەڭ ءىرى جانە تەحنولوگيالىق جابدىقتالعان وندىرىستەردىڭ ءبىرى. وندا 10 مىڭ تونناعا دەيىن قىزاناق، قيار جانە سالات ءونىمى وسىرىلەدى.

«مەملەكەت باسشىسى ق.ك. توقايەۆ حالىققا جولداۋىندا اۋىل شارۋاشىلىعى ونىمدەرىن تەرەڭ وڭدەۋگە ەرەكشە ءمان بەرۋدى تاپسىرعان بولاتىن. سوندىقتان «Nur Otan» پارتياسى وڭىرلىك سايلاۋالدى باعدارلاماسىندا مال جانە وسىمدىك شارۋاشىلىقتارىنا، اۋىل شارۋاشىلىعى ونىمدەرىن وڭدەۋدە جاڭا تەحنولوگيالاردى ەندىرۋدى باستى مىندەتتەردىڭ ءبىرى رەتىندە قويدى. اوك سالاسىندا 10 مىڭنان اسا جۇمىس ورىندارىن قۇرۋ جوسپارلانۋدا» - دەپ اتاپ ءوتتى Nur Otan پارتياسى ءتوراعاسىنىڭ ءبىرىنشى ورىنباسارى.

كەزدەسۋ بارىسىندا ول كاسىپورىن قىزمەتكەرلەرىنىڭ وتىنىشتەرىن باقىلاۋعا الاتىنىن جەتكىزدى. مىسالى، اسەل ءجۇمادىلوۆا ىلە اۋدانىنىڭ ەلدى مەكەندەرىن ينتەرنەتكە قوسۋدى، ال اقمارال يليمحانوۆا پارتيادان جەرگىلىكتى كارىز جەلىلەرى مەن جولدارعا جوندەۋ جۇرگىزۋ جايىن شەشۋدى سۇرادى.

Nur Otan پارتياسى ءتوراعاسىنىڭ ءبىرىنشى ورىنباسارى قاپشاعاي قالاسى بويىنشا «Nur Otan» پرايمەريزىنە قاتىسۋشىلارمەن دە كەزدەسىپ، جەرگىلىكتى تۇرعىنداردى تولعاندىرعان ماسەلەلەردى تالقىلادى.

«ەلباسى، پارتيا ليدەرى ن.ءا. نازاربايەۆتىڭ تاپسىرماسىمەن «Nur Otan» ءاربىر ءوڭىر، قالا، اۋدان بويىنشا 216 سايلاۋالدى باعدارلامانىڭ جوبالارىن جاريالادى. قاپشاعاي قالاسىندا تاياۋداعى 5 جىلدا اۋىل شارۋاشىلىعى سالاسىندا جاڭا وندىرىستەر قۇرۋ، كولىك، الەۋمەتتىك جانە تۇرعىن ءۇي ينفراقۇرىلىمىن جاقسارتۋ جوسپارلانۋدا. سونىمەن قاتار جوبانىڭ كەيبىر ولقى تۇستارىنا دا نازار اۋداردىم. اتاپ ايتقاندا، جالپىلاما تۇجىرىمداۋ، ناقتى ينديكاتورلاردىڭ جەتكىلىكسىزدىگى، كورسەتكىشتەردىڭ تومەندەتىلۋى جانە ت.ب. ماسەلەن، ەلەكتروندى فورماتتا ۇسىنىلاتىن مەملەكەتتىك قىزمەتتىڭ ۇلەسىن تەك 75%-عا دەيىن عانا جەتكىزۋ جوسپارلانعان»، - دەدى ول.

تالقىلاۋ بارىسىندا پرايمەريز قاتىسۋشىلارى الەۋمەتتىك ينفراقۇرىلىم، ءبىلىم بەرۋ نىساندارىن سالۋ، گازداندىرۋ جانە تۇرعىن ءۇي كوممۋنالدىق شارۋاشىلىعىن جاڭعىرتۋ، قالالىقتاردى ۇزدىكسىز سۋمەن قامتۋ سەكىلدى باسقا دا وزەكتى ماسەلەلەردى كوتەردى.

پارتيا ءتوراعاسىنىڭ ءبىرىنشى ورىنباسارى فيليالعا بارلىق ۇسىنىستى مۇقيات قاراپ، ەسكەرۋدى تاپسىردى. ونىڭ ىشىندە جاستارعا جۇمىس ورىندارىن قۇرۋ، شوب-قا قولداۋ كورسەتۋ بويىنشا قوسىمشا شارالاردى قولعا الۋ جۇكتەلدى. باعدارلامانىڭ تۇپكىلىكتى نۇسقاسى قالا تۇرعىندارىمەن تالقىلانعاننان كەيىن قابىلدانادى.

سونداي-اق، وسى كۇنى باۋىرجان بايبەك ءوڭىر جۇرتشىلىعىمەن دە كەزدەسىپ، پارتيانىڭ الماتى وبلىسى بويىنشا سايلاۋالدى باعدارلاماسىنىڭ جوباسىن تالقىلادى. جەتىسۋ ءوڭىرىنىڭ تۇرعىندارىن وسىناۋ ىستەن سىرت قالماي، Primaries.kz سايتى ارقىلى ايماقتى دامىتۋ بويىنشا ءوز يدەيالارى مەن ۇسىنىستارىن ورتاعا سالۋعا شاقىردى.