پرەزيدەنت ق.توقايەۆ باتىس قازاقستان وبلىسىنىڭ اكىمى عالي ەسقالييەۆتى قابىلدادى. بۇل تۋرالى اقوردا سايتى حابارلادى.
قازاقستان پرەزيدەنتىنە ءوڭىردىڭ الەۋمەتتىك-ەكونوميكالىق دامۋىنىڭ نەگىزگى كورسەتكىشتەرى، سونداي-اق، بۇعان دەيىن بەرىلگەن تاپسىرمالاردىڭ ورىندالۋى جونىندە باياندالدى.
قاسىم-جومارت توقايەۆقا جايىق وزەنىندەگى سۋ دەڭگەيىنىڭ تومەندەۋى، ءوڭىردىڭ ەنەرگياعا تاۋەلدىلىگى جانە جەرگىلىكتى جولداردىڭ جاعدايى سياقتى وبلىستاعى نەگىزگى ماسەلەلەر تۋرالى مالىمەت بەرىلدى. مەملەكەت باسشىسى باتىس قازاقستان وبلىسىنىڭ اكىمىنە ۇكىمەتپەن بىرلەسە وتىرىپ، اتالعان پروبلەمالاردى شەشۋدى تاپسىردى.
قاسىم-جومارت توقايەۆ ەتتى مال شارۋاشىلىعىن دامىتۋ جانە وسى باعىتقا عىلىمي تۇرعىدان باسا ءمان بەرۋ، مۇناي مەن گاز وندىرۋگە قاتىسى جوق سالاعا تارتىلاتىن ينۆەستيسيانى ۇلعايتۋ، ونەركاسىپتى ءارتاراپتاندىرۋ، سونداي-اق، وڭدەۋ سەكتورىنىڭ ءوندىرىسىن ارتتىرۋ جونىندە عالي ەسقالييەۆتىڭ الدىنا ءبىرقاتار مىندەت قويدى.
مەملەكەت باسشىسى جۇمىسسىز جانە ءوزىن-وزى جۇمىسپەن قامتىعان ازاماتتاردى ەكونوميكالىق قىزمەتكە تارتۋدى جالعاستىرۋعا، سونىمەن قاتار ايماقتاعى ءۇش اۋىسىمدى جانە اپاتتى جاعدايداعى مەكتەپتەرگە قاتىستى ماسەلەلەردى تۇبەگەيلى شەشۋگە تاپسىرما بەردى.
پىكىر قالدىرۋ