بۇگىن «Nur Otan» پارتياسى ءتوراعاسىنىڭ ءبىرىنشى ورىنباسارى باۋىرجان بايبەك پارتياىشىلىك ىرىكتەۋ – پارايمەريزدە داۋىس بەردى. بۇل تۋرالى ول Facebook جەلىسىندەگى پاراقشاسىندا جازدى.

«پرايمەريزدە داۋىس بەردىم. سايلاۋ ۋچاسكەسىنە ارنايى بارىپ ءوز تاڭداۋىمدى جاسادىم. ءبىر جاعىنان داۋىس بەرۋ پروسەسىنىڭ ۇيىمداستىرىلۋ دەڭگەيىن دە بايقاپ كورمەك بولدىم.

پارتيا ليدەرى ن.ءا. نازاربايەۆتىڭ تاپسىرماسىمەن «Nur Otan»-نىڭ پارتياىشىلىك سايلاۋى ەلىمىزدىڭ پارتيالىق-ساياسي دامۋ تاريحىندا تۇڭعىش رەت رەسپۋبليكالىق اۋقىمدا وتۋدە. بۇل – ەلباسى باستاماسىمەن قولعا الىنعان پارتيانى «قايتا جانداندىرۋدى» تۇيىندەيتىن كەزەڭنىڭ ءبىرى.

بۇگىنگى تاڭدا ادامدار قوعام ومىرىنە بەلسەندى اتسالىسقىسى كەلەدى. وزگەرىستەرگە، جاڭا تۇلعالار مەن تىڭ يدەيالارعا دەگەن سۇرانىس ارتا تۇسۋدە. ەلىمىزدىڭ جەتەكشى ساياسي كۇشى رەتىندە «Nur Otan» پارتياسى ەل سۇرانىسىن دەر كەزىندە قاناعاتتاندىرىپ وتىر.

باستاپقىدا تۋىنداعان كۇمانعا قاراماستان، بۇگىندە پرايمەريزدىڭ ءوز دەڭگەيىندە ءوتىپ جاتقانىن نىق سەنىممەن ايتۋعا تولىق نەگىز بار.

جاريا تۇردەگى پارتياىشىلىك ىرىكتەۋ ەلىمىز ءۇشىن سونى ساياسي جاڭالىق رەتىندە جۇرت قىزىعۋشىلىعىن تۋعىزىپ، 10 مىڭنان استام قاتىسۋشى 60 مىڭنان استام كەزدەسۋ مەن پىكىرسايىس وتكىزدى. ءىس-شارالار بارىسىندا 1،4 ملن. ادام قامتىلدى.

ەل پرەزيدەنتى ق.ك. توقايەۆتىڭ "حالىق ۇنىنە قۇلاق اساتىن مەملەكەت" تۇجىرىمداماسى اياسىندا ءاربىر ءوڭىر، قالا مەن اۋدان بويىنشا جاريالانعان 216 سايلاۋالدى باعدارلامانىڭ جوباسىنا قاتىستى 20 مىڭ ۇسىنىس جينالدى. تۇرعىنداردى تولعاندىراتىن تاقىرىپتاردىڭ العاشقى بەستىگىنە – تۇرعىن ءۇيدىڭ قولجەتىمدىلىگى، جولداردى جوندەۋ، الەۋمەتتىك قولداۋ، دەنساۋلىق ساقتاۋ مەن ءبىلىم سالالارىنىڭ دەڭگەيىن ارتتىرۋ ماسەلەلەرى كىرەدى. ەلباسى تاپسىرعانداي، بارلىق كوتەرىلگەن ماسەلەلەردى پارتيا ەرەكشە باقىلاۋعا الادى.

«پرايمەريز» جۇيەسىندە ەلەكتروندى داۋىس بەرۋگە قاتىسۋ ءۇشىن 730 مىڭداي پارتيا مۇشەسى تىركەلدى. ءقازىر 600 مىڭداي ادام داۋىس بەردى، بۇلاردىڭ ىشىندە ءداستۇرلى تاسىلمەن (قاعاز بيۋللەتەندەر ارقىلى) داۋىس بەرۋشىلەر دە بار.

ساياسي قاربالاس قىزا تۇسەتىنىن الدىن الا بولجاپ، ءبىز مامانداردىڭ ۇسىنىسى بويىنشا داۋىس بەرۋ كەزەڭىن ءۇش كۇنگە بولدىك. ايتسە دە، ءبىرىنشى كۇنى تەحنيكالىق قيىندىقتار تۋىندادى، ءبىز ونى جىلدام رەتتەدىك. سونىمەن بىرگە كانديداتتاردىڭ وتىنىشتەرى بويىنشا داۋىس بەرۋدى تاعى ءبىر كۇنگە ۇزارتۋ تۋرالى شەشىم قابىلداندى (4 قازان كۇنگى ساعات 14.00-گە دەيىن). بۇل – ادىلەتتى شەشىم بولدى.

ەلباسىنىڭ پرايمەريزدى اشىق، ءادىل وتكىزۋ مەن بارشا قاتىسۋشىعا بىردەي مۇمكىندىك تۋعىزۋ تۋرالى تاپسىرماسىنىڭ ورتالىق اپپارات ءۇشىن ماڭىزى زور. كىم ەكەنىنە قاراماستان، ءتارتىپ بۇزۋشىلىقتارعا دەر كەزىندە نازار اۋدارىپ، كانديداتتى داۋىس بەرۋدەن الىپ تاستاۋعا دەيىن شارا قولدانىپ، جۇمىستى تىڭعىلىقتى ۇيىمداستىرىپ وتىرعان پارتيالىق باقىلاۋ كوميتەتى مەن ونىڭ جەرگىلىكتى جەرلەردەگى كوميسسيالارىنىڭ مۇشەلەرىنە العىس ايتامىن.

مۇمكىندىكتى پايدالانا وتىرىپ، پرايمەريزدىڭ بارشا قاتىسۋشىلارىنا كەلەسى ماسەلەلەردى ايتا كەتكىم كەلەدى.

ارينە، اركىمنىڭ ءوز كۇتكەن بولجامى بار. وسى كەزەڭدە كوزدەگەن ماقساتىنا جەتە المايتىندار دا، جەڭىس تۇعىرىنان كورىنەتىندەر دە بولادى. دەگەنمەن بۇل جەردە ۇتقاندار مەن ۇتىلعاندار جوق. ءبارى دە يگىلىككە جەتتى. بۇل ءىس-شارا ەڭ الدىمەن ەلىمىز ءۇشىن يگى ءىس بولدى. جەتەكشى پارتيادا اشىق پارتياىشىلىك سايلاۋ وتكىزە وتىرىپ، سىزدەرمەن بىرگە ۇزاق جىلدار بويى جەمىسىن بەرەتىن جاڭا ساياسي مادەنيەتتىڭ نەگىزىن قالادىق. «Nur Otan» پارتياسىنىڭ كوشباسشىلىعى وسىدان كورىنەدى.

بارشا ۇمىتكەرگە ساتتىلىك تىلەيمىن. ۇيىمداستىرۋ كوميتەتى داۋىس بەرۋ ناتيجەلەرىن 6 قازاندا جاريالايدى»، - دەپ جازدى پارتيا ءتوراعاسىنىڭ ءبىرىنشى ورىنباسارى.