قىرعىزستاننىڭ استاناسى بىشكەكتە پارلامەنت سايلاۋىنىڭ ءادىل وتپەگەنىن ايتقان نارازى تۇرعىنداردىڭ بەيبىت شەرۋى قاقتىعىسقا ۇلاستى. نارازى توپ "اق ءۇيدى" باسىپ الىپ، تەرگەۋ يزولياتورى مەن كولونياداعى ەكس-پرەزيدەنت المازبەك اتامبايەۆتى پەن بۇرىنعى پرەمەر-مينيستر ساپار يساقوۆتى جانە مينيسترلەر كابينەتىنىڭ ەكس-توراعاسى جانتورو ساتىبالدييەۆتى بوساتتى. كورشى ەلدەگى ساياسي جاعدايعا قازاقستان ازاماتتارى دا بەيجاي قارار ەمەس. قامشى ءتىلشىسى ايىرقالپاقتى ەلدەگى احۋالعا الەۋمەتتىك جەلى رەاكسياسىن ۇسىندى.

"ءجيى اۋىسا بەرگەنىنە قۇلاق ۇيرەنىپ كەتتى"

جۋرناليست جازيرا بەگالى facebook پاراقشاسىندا "اتامبايەۆ قايتا پرەزيدەنت بولا ما؟" دەگەن جازبا جاريالاپ، ءوزىنىڭ ىستىقكولدە كورگەندەرىمەن ءبولىستى.

– قازىرگى مەملەكەت باسشىسى سوورونباي جەەنبەكوۆ قاشىپ كەتتى. ۇشىپ كەتتى. ول مىنگەن اۋە كەمەسىنىڭ قايدا قونعانى جايلى اقپارات جوق.

ەندى كورشى ەل تاعى ۋاقىتشا پرەزيدەنتسىز قالدى. ءجيى اۋىسا بەرگەنىنە قۇلاق ۇيرەنىپ كەتتى. بىلتىر سول ريەۆوليۋسيا كەزىندە ىستىقكولدە بولعاندا اق ءۇيدى قيراتۋ، پرەزيدەنتتى قۋىپ جىبەرۋ، ورتەپ جىبەرۋ قىرعىز اعايىندارعا وڭاي ەكەن دەپ ويلادىم، – دەپ جازدى جۋرناليست.

جانبولات ماماي، "دەموكراتيالىق پارتيا" باستاماشىل توبىنىڭ جەتەكشىسى، ساياساتكەر:

– حالقىنا وق اتپاعان، بيلىككە تاس كەنەشە جابىسپاي، ءوز ەركىمەن كەتكەن پرەزيدەنتتى ەلى قاشان دا قۇرمەت تۇتادى.

قىرعىزداردىڭ ەڭ ءبىرىنشى بولىپ اتامبايەۆتى اباقتىدان بوساتقانى دا سوندىقتان!

گۇلميرا ءابىقاي، جۋرناليست، تەلەجۇرگىزۋشى:

– ءاۋ زاماننان قويىمىز قورالاس، مالىمىز ارالاس كورشى ەلمىز عوي، امان بولسىن قىرعىزدار! ءوزىم اتامبايەۆتىڭ بوستاندىققا شىققانىنا قۋاندىم، ول پرەزيدەنت بولعان از ۋاقىتتا كورشى ەلدە ءتارتىپ ورناپ ەدى.

ەسداۋلەت قىزىربەك ۇلى، جۋرناليست:

– قىرعىزستاندا ەندى ساپار يساكوۆ پرەزيدەنت بولاتىن شىعار.

"ورتالىق ازياداعى تۇركىنىڭ جۇرتى تۇلەيتىن زاماندا توزعانى وكىنىشتى"

اياتجان احمەتجان ۇلى، QazBilim ورتالىعىنىڭ  ديرەكتورى:

– قىرعىز بيلىگىنىڭ دە، دەموكراتياسىنىڭ دا بوعى شىعىپ كەتتى. اۋىرلاۋ بولسا دا شىندىعى وسى. ۇلت رەتىندە قالىپتاسپاعان قاۋىمعا دەموكراتيا اپات اكەلەدى دەگەن ءسوز بار ەدى. ءيا، دەموكراتيا قىرعىز اعايىنعا اپات اكەلىپ تۇر. ايتپەسە، تاپتالىپ، ورتەلىپ، قيراتىلىپ جاتقان دا ءوز قىرعىزىنىڭ مۇلكى ەكەنىن سول جۇرت ءبىلۋى كەرەك-تى. پرەزيدەنتىن قۋىپ جىبەرگەننەن كوسەگەسى كوگەرمەدى، كەرىسىنشە ءار جولى ەكونوميكالىق قۇلدىراۋعا تۇسەدى. جاڭا پرەزيدەنتى ەسكى پرەزيدەنتىن سوتتايدى... ءيا، جۇرتقا كۇلەر جايىمىز جوق شىعار، ءبىراق، ءبىر تۋعان اعايىن قىرعىزدىڭ توزۋى، كەرى كەتۋى ءبىزدىڭ ەل ءۇشىن دە وكىنىشتى. ورتالىق ازياداعى تۇركىنىڭ جۇرتى تۇلەيتىن زاماندا توزعانى وكىنىشتى. 2015 تە قىرعىز ەلىندە بولعاندا شىن جانىم اشىعان ەدى، ءوزىمىز ءۇشىن شۇكىر دەپ كەتىپ ەدىم. تاعى كەرى كەتۋ...

سەرعالي بالاجان، جۋرناليست:

– 300 مىڭ بەلارۋس 3 ايدان بەرى جاساي الماعاندى 3 مىڭ قىرعىز 3-4 ساعاتتا توڭكەرىپ تاستادى.

ەرقانات تۇرسىنجان ۇلى، جەلى بەلسەندىسى:

– اسقار اقايەۆ 61 جاسىندا، قۇرمانبەك باكييەۆ 61 جاسىندا، روزا وتىنبايەۆا 61 جاسىندا، الماسبەك اتامبايەۆ 61 جاسىندا پرەزيدەنتتىكتەن كەتىپتى جانە كەتىردى. بيىل سوورانباي جانىبەكوۆ 61 جاستا. قالاي ويلايسىزدار پرەزيدەنتتەن كەتىرە مە؟