پرەزيدەنت قاسىم-جومارت توقايەۆتىڭ باسپا ءسوز حاتشىسى بەرىك ءۋالي Facebook-تەگى پاراقشاسىندا قىرعىزستانداعى قاقتىعىسقا قاتىستى مالىمدەمە جاسادى.
– قىرعىزستاندا بولىپ جاتقان وقيعالار – سول ەلدىڭ ىشكى ماسەلەسى. قازاقستاندا باۋىرلاس قىرعىزستانمەن ءوزارا ءداستۇرلى دوستىق قاتىناستاردى جانە ستراتەگيالىق سەرىكتەستىكتى نىعايتۋ اسا ماڭىزدى دەپ سانايدى.
سونىمەن قاتار كورشىلەس ەلدەگى احۋالدى تۇراقتاندىرۋ ءىسى قىرعىزستاننىڭ كونستيتۋسياسى مەن زاڭدارىنا سايكەس جۇزەگە اسىرىلادى دەپ ۇمىتتەنەدى. قىرعىز حالقى ءوز مەملەكەتىنىڭ ۇزاق مەرزىمدى مۇددەسى ءۇشىن كۇردەلى جاعدايدان شىعۋدىڭ ءتيىمدى جولىن تابادى دەپ پايىمدايدى، – دەپ جازدى بەرىك ءۋالي.
ەسكە سالا كەتەيىك، قىرعىزستاندا 4 قازاندا وتكەن پارلامەنت سايلاۋىنىڭ ناتيجەسىمەن كەلىسپەگەن ازاماتتار بىشكەكتە نارازىلىق اكسياسىنا شىققان. اكسيا سوڭى جاپپاي تارتىپسىزدىككە ۇلاسىپ، نارازى توپ اق ءۇيدى باسىپ العان. ولار سايلاۋ قورىتىندىسىنىڭ كۇشىن جويىپ، جاڭا سايلاۋ وتكىزۋدى تالاپ ەتۋدە.
پىكىر قالدىرۋ