الماتى وبلىسىنىڭ اكىمى اماندىق باتالوۆتالدىقورعانداعى 200 ادامعا ارنالعان ينفەكسيالىق اۋرۋحانانى اشتى. مەكەمەنىڭ قۇرىلىسىنا، سيفرلىق رەنتگەن اپپاراتى جانە توسەك-ورىن الۋعا بارلىعى 7،5 ملرد.تەڭگە جۇمسالعان. اۋماعى 4،18 گەكتاردى الىپ جاتقان جۇقپالى اۋرۋلار اۋرۋحاناسى 55 كۇندە تۇرعىزىلدى.

– مەملەكەت باسشىسى قاسىم-جومارت توقايەۆتىڭ تاپسىرماسىنا وراي، كوروناۆيرۋستىق ينفەكسيانىڭ ەكىنشى تولقىنىنا دايىندالۋ ماقساتىندا رەسپۋبليكامىزدىڭ بىرنەشە وڭىرىندە ءمودۋلدى جۇقپالى اۋرۋلار اۋرۋحاناسىن سالۋ قولعا الىندى. ءبىزدىڭ وبلىس تاپسىرما بەرىلىسىمەن جۇمىستى باستاپ كەتتى. بۇگىن، مىنە، قىسقا مەرزىمدە اۋرۋحانانى پايدالانۋعا بەرىپ وتىرمىز، – دەگەن اماندىق عابباس ۇلى ىندەت بەلەڭ العان كەزدە قايسارلىق كورسەتكەن دارىگەرلەر قاۋىمىنا العىس ءبىلدىردى. مەديسينا ماماندارىنا الداعى ۋاقىتتا بارلىق جاعدايدىڭ جاسالاتىنىن ايتتى. اۋرۋحانا جۇقپالى ىندەتتى ەمدەۋگە جان-جاقتى دايىن. ءبىر مەزگىلدە 200 ادامدى ەمدەۋگە ارنالعان اۋرۋحانانىڭ 20 توسەگى جان ساقتاۋعا ارنالعان. مرت، ساندىق رەنتگەن اپپاراتى، ەكى گەمودياليز اپپاراتى بار. جان ساقتاۋ ءبولىمىنىڭ توسەكتەرى جاساندى تىنىس الدىرۋ اپپاراتتارىمەن جابدىقتالعان.

اۋرۋحاناعا مامان تارتۋ ءۇشىن كوتتەدجدى قالاشىقتان 47 باسپانا بەرىلەدى. سونداي-اق، دارىگەرلەرگە ارنالعان جاتاقحانا سالىنۋدا. وندا ۇيلەنبەگەن جانە وتباسىلى ماماندارعا ارنالعان بولمەلەر بولادى. جاتاقحانا قاراشا ايىندا پايدالانۋعا بەرىلمەكشى. الەۋمەتتىك جاعداي جاساۋدىڭ ناتيجەسىندە اتالمىش اۋرۋحاناعا 10 دارىگەر كەلمەك. ودان باسقا، رەانيماتولوگ، كارديولوگ، ەندوكرينولوگ دارىگەرلەر جۇمىسقا شاقىرىلادى.

اۋرۋحانانى اشقان اماندىق عابباس ۇلى نىساندى قىسقا مەرزىمدە ساپالى سالىپ شىققان «BI Group» قۇرىلىس كومپانياسىنا العىس ايتتى. «قۇرىلىسشىلارعا ريزاشىلىعىمدى بىلدىرەمىن. ءوزىم دە قۇرىلىسشى بولعاندىقتان جۇمىستىڭ قانداي دەڭگەيدە جاسالىپ جاتقانىن قابىرعاسى قالانعان كەزدە-اق بايقاعانمىن. مىنە، ءىشىن ارالاپ شىقتىق. ءبارى ءتۇپ-تۇزۋ، تالاپقا ساي. ءقاۋىپسىز جانە جىلى بولاتىنىنا سەنىم مول»، – دەدى ول.

اۋرۋحانانى مۇقيات قاراپ شىققان وبلىس باسشىسى دارىگەرلەردىڭ جۇمىسىنا ساتتىلىك تىلەدى. مەكەمەنىڭ سىرتى دا جاسىل جەلەڭمەن كومكەرىلگەن. ايماق باسشىسى اۋرۋحانانىڭ سىرت كەلبەتىن ساقتاپ، اعاشتار مەن كوگالدى ۋاقىتىندا سۋارىپ، كۇتىپ-باپتاۋدى تاپسىردى.