الماتىداعى م.تىنىشبايەۆ اتىنداعى قازاق كولىك جانە كوممۋنيكاسيا اكادەمياسى جابىلاتىن بولدى.

ءبىلىم جانە عىلىم سالاسىنداعى ساپانى قامتاماسىز ەتۋ كوميتەتى م.تىنىشپايەۆ اتىنداعى قازاق كولىك جانە كوممۋنيكاسيا اكادەمياسىن باس ليسەنزياسىنان ايىرۋ تۋرالى شەشىم قابىلدادى. شەشىم 10 جۇمىس كۇنى وتكەننەن كەيىن زاڭدى كۇشىنە ەنەدى، ال ودان كەيىن جوعارى وقۋ ورنى ءبىلىم بەرۋ سالاسىنداعى قىزمەتىن توقتاتۋعا مىندەتتى بولادى. 

ءبىلىم جانە عىلىم مينيسترلىگىنىڭ رەسمي مالىمەتىندە كورسەتىلگەندەي، اكادەميادا جىل بويى جوسپارلى جانە جوسپاردان تىس تەكسەرۋلەر جۇرگىزىلىپ، ءبىلىم بەرۋ سالاسىنداعى ورەسكەل بۇزۋشىلىقتار انىقتالعان. اتاپ ايتقاندا، وقۋ پروسەسى پروفەسسورلىق-وقىتۋشىلىق قۇراممەن، وندىرىستىك پراكتيكا بازالارىمەن، وقۋ، وقۋ-ادىستەمەلىك جانە عىلىمي ادەبيەتتەرمەن قامتاماسىز ەتىلمەگەن. ءبىلىم بەرۋ باعدارلامالارى جۇمىس بەرۋشىلەردىڭ سۇرانىسىنا تولىق سايكەس كەلمەدى، بۇل تۇلەكتەردىڭ جۇمىسقا ورنالاسۋىنا دا اسەر ەتتى. 

سونداي-اق، اكادەميانىڭ ءبىلىم بەرۋ باعدارلامالارىنىڭ شامامەن 60%-ى جۇمىس بەرۋشىلەردىڭ تالاپتارىنا سايكەس كەلمەيتىن كورىنەدى.

ءبىلىم جانە عىلىم سالاسىنداعى ساپانى قامتاماسىز ەتۋ كوميتەتىنىڭ ءتورايىمى گۇلزات كوبەنوۆا اكادەميانىڭ جابىلۋىنا قارسىلىق تانىتاتىنداردىڭ بارى مۇمكىن ەكەندىگىن جانە ولار كوميتەت شەشىمىنە سوت ءتارتىبى بويىنشا شاعىمدانۋعا قۇقىلى ەكەنىن ايتادى:  

– ءبىز مەملەكەت باسشىسىنىڭ ساپالى ءبىلىم بەرۋدى قامتاماسىز ەتپەيتىن جوعارى وقۋ ورىندارىن جابۋ بويىنشا قويعان مىندەتتەرىن ىسكە اسىرۋعا ءتيىسپىز. ءبىلىم الۋشىلار سول قالاداعى باسقا جوعارى وقۋ ورىندارىنا گرانتىن ساقتاي وتىرىپ، اۋىسا الادى، سونداي-اق اقىلى نەگىزدە وقىعاندار ءۇشىن دە وقۋ قۇنى ارتپايدى. اۋىسۋ ءۇشىن ولارعا سەمەستردىڭ اياقتالۋىن كۇتۋدىڭ قاجەتى جوق، ءبىز قازىردەن باستاپ باسقا جوو اۋىسۋعا رۇقسات بەردىك... پروفەسسورلىق-وقىتۋشىلىق قۇرامدى جۇمىسقا ورنالاستىرۋ بويىنشا دا جۇمىس جۇرگىزىلەتىن بولادى، – دەپ اتاپ ءوتتى .

ال قازاقستان جوعارى وقۋ ورىندارى قاۋىمداستىعىنىڭ پرەزيدەنتى راحمان الشانوۆتىڭ ايتۋىنشا، وقۋ ورنىنىڭ تومەن جاعدايعا تۇسۋىنە باسشىلىق كىنالى. اكادەمياعا قاتىستى كوپتەگەن شاعىمدار ءتۇسىپتى:

– وكىنىشتىسى سول، قازىرگى تاڭدا بۇل ءبىلىم ورداسىندا بولاشاق مامانداردى ءتيىستى دەڭگەيدە دايارلاۋ بويىنشا تۇيتكىلدى ماسەلەلەر جەتەرلىك. مۇنداي جاعداي ەلدىڭ ەكونوميكاسى ءۇشىن ستراتەگيالىق ماڭىزدى سالاسىنا مامان دايىنداۋ بارىسىندا ورىن الماۋى ءتيىس. ءبىلىم بەرۋ باعىتتارى ۇقساس وقۋ ورىندارىنىڭ كۇش-جىگەرىن بىرىكتىرۋ قاجەت شىعار، – دەدى.

اكادەمياداعى باكالاۆرياتتىڭ 8 باعىتى، ماگيستراتۋرانىڭ 6 باعىتى، دوكتورانتۋرانىڭ 4 باعىتى بويىنشا ليسەنزيالار الماتى قالاسىنىڭ باسقا 30 جوعارى وقۋ ورنىندا بار.

قازىرگى ۋاقىتتا  م. تىنىشپايەۆ اتىنداعى قازاق كولىك جانە كوممۋنيكاسيا اكادەمياسىندا 5 مىڭنان استام ادام وقيدى. اكادەميادا وقۋ قۇنى – ءبىلىم بەرۋ باعدارلاماسىنا بايلانىستى 427 مىڭ تەڭگەدەن باستاپ 1،5 ملن تەڭگەگە دەيىن.