ۇلتىمىزدىڭ وتكەن تاريحىنا كوز جىبەرسەك، ونىڭ تالاي قيىن كەزەڭدى باستان كەشىرگەنىن انىق بايقايمىز. مىنە، وسىنداي تاعدىردىڭ تالقىسىنا تۇسكەن داۋىردە حالقىمىز ءوزىنىڭ سابىرلىلىعى، پاراساتتىلىعى، قاجىر-قايراتى، ورەلى ومىرشەڭدىگى، كۇشتى ەرىك-جىگەرىمەن بۇگىنگى كۇنگە امان-ەسەن جەتىپ، الەم ەلدەرىنىڭ الدىڭعى شوعىرىنان كورىنۋدە.
وسىنداي ۇلكەن جەتىستىككە جەتۋىمىزدە قازىنالى قارتتاردىڭ ورنى مەن ءرولى دە ەرەكشە. ولار سوناۋ مىڭجىلدىقتار بەدەرىندە ەلگە تۇتقا بولعان، بيلىككە ارالاسىپ، تالاي كەلەلى ماسەلەدە كەسىم ايتقان، شەشىم شىعارعان دانالاردىڭ جالعاسى ىسپەتتى. بۇگىندە سول ءدىلمارلار داڭعىلىمەن ءجۇرىپ، قوعامدىق جۇمىستارعا بەلسەنە ارالاسقانداردىڭ دەنى ارداگەرلەر ۇيىمىنىڭ مۇشەلەرى.
سول قاتاردا تالدىقورعان قالالىق ارداگەرلەر ۇيىمىنىڭ جانىنان قۇرىلعان «مۇراگەر» ايماقتىق ارداگەرلەر كەڭەسىنىڭ اتقارعان شارۋاسى كوپ. اسىرەسە، ولار قالا مەكتەپتەپتەرىندەگى بالالاردىڭ اتا-بابا ءداستۇرىن ۇستانىپ، كەلەشەكتە كەمەل ويلى ازامات بولىپ شىعۋى جولىندا بارىنشا ەڭبەك ەتىپ كەلەدى. بيىلعى پاندەميا جاعدايىندا دا جۇمىسىن ونلاين فورماتقا كوشىرىپ، ءداستۇرلى تاربيە باعىتىنان جاڭىلعان جوق.
ايتا كەتەرلىگى، «مۇراگەر» ايماقتىق ارداگەرلەر كەڭەسىنىڭ ءتورايىمى فارۋزا بايىسوۆا ءوزىنىڭ ۇزاق جىلدىق تاجىريبەسى مەن بار بىلگەنىن جاستارعا ۇيرەتۋدەن جالىقپايتىن جان. وتكەندە اتالعان ۇيىم قالامىزداعى بەلسەندى ارداگەر انالاردىڭ باسىن قوسىپ، بيىلعى اتقارعان جۇمىسىنىڭ ەسەبىن شىعاردى.
وندا ۇرپاق بولاشاعى ءۇشىن ىستەلەتىن جۇمىستاردىڭ رەتى ءسوز بولىپ، بيىلعى قيىن جاعدايدا ءوز باعدارلامالارىن ءساتتى ورىنداۋ جولدارىن تانىستىردى. ءبىر جاعىنان وتباسى تاربيەسىنە ەرەكشە دەن قويىپ، بوس ۋاقىتى بولعاندا ۇيىم جۇمىسىنا اتسالىسىپ، كورەگەندىك تانىتقان انالارعا العىس حات تاپسىرىلىپ، سىي-سياپات كورسەتىلدى. ال شاراعا قاتىسقان وبلىستىق جانە قالالىق ارداگەرلەر ۇيىمىنىڭ وكىلدەرى فارۋزا بايىسوۆانىڭ ەڭبەگىن ەلەگەن ۇيىم ءتوراعالارى اتىنان العىس ايتىپ، ماراپات تابىستادى.
«ارازداسىپ اعايىن كەتەر ەدى، ءبىر قاريا بولماسا ءبىر اۋىلدا»، – دەپ مۇقاعالي اقىن جىرلاعانداي، قاشاندا الىستى جاقىنداتىپ، جاقىننىڭ بەرەكەسىن نىعايتقان اردەگەرلەردىڭ يگىلىكتى ىسىنە ءبىز دە ءتانتى بولدىق.
پىكىر قالدىرۋ