شىمكەنتتىڭ باس سانيتار دارىگەرى ءابدىماناپ تولەبايەۆ كارانتين شارالارىنا بايلانىستى جاڭا قاۋلىعا قول قويدى. قاۋلى شىمكەنت قالاسى تاۋارلار مەن قىزمەت كورسەتۋ ساپاسى مەن قاۋىپسىزدىگىن باقىلاۋ دەپارتامەنتىنىڭ سايتىندا جاريالاندى.

"شىمكەنت قالاسىنىڭ اۋماعىندا 2020 جىلى 12 قازان ساعات 00:00-دەن باستاپ 2020 جىلدىڭ 26 قازان ساعات 00:00-گە دەيىن كارانتين جانە شەكتەۋ شارالارى ۇزارتىلسىن" دەلىنگەن رەسمي سايت تاراتقان قاۋلىدا.

اتالعان قاۋلىدا دەمالىس جانە مەرەكە كۇندەرى جابىق ازىق-تۇلىك جانە ازىق-تۇلىك ەمەس بازارلاردىڭ قىزمەتى توقتاتىلىپ، تاۋار ساتاتىن بازارلار مەن جارمەڭكەلەر 6.00-دەن 18.00-گە دەيىن جۇمىس ىستەيتىن بولادى.

سونىمەن قاتار، ءبىر ادامعا كەم دەگەندە 4 شارشى مەتر اۋماق جەر بولۋى شارت، سىيىمدىلىعىنىڭ تولۋ كورسەتكىشى 30 پروسەنتتەن اسپاۋى كەرەك. دەمالىس جانە مەرەكە كۇندەرى جابىق بازارلار جۇمىسىنا تىيىم سالىندى.

جارمەڭكەلەردىڭ جۇمىسى كەزىندە سانيتارلىق-دەزينفەكسيالىق رەجيم قاتاڭ ساقتالادى. دەزينفەكسيالىق توننەلدەر مەن سانيتايزەرلەر ورناتىلاتىن بولادى. 

سونداي-اق، قاۋلى دا كينوتەاترلاردىڭ (اشىق الاڭدا ورنالاسقان)، سيرك، ساۋدا-ويىن-ساۋىق كەشەندەرى مەن ورتالىقتاردىڭ، ساۋدا ۇيلەردىڭ ىشىندەگى، بالالاردىڭ ويىن الاڭدارىنىڭ، مۇز الاڭدارىنىڭ، باتۋتتار مەن فۋدكورتتاردىڭ جۇمىسىنا تىيىم سالىندى.