«اگرارلىق نەسيە كورپوراسياسى» «قازاگرو» ۇبح ەنشىلىك كومپانياسى ەلىمىز بويىنشا 272،2 ملرد تەڭگەدەن استام سوماعا 298 ينۆەستيسيالىق جوبانى قارجىلاندىردى. بۇل رەتتە انك اۋىل شارۋاشىلىعى ونىمدەرىن ەكسپورتقا باعدارلاي وتىرىپ، ءوندىرىستى دامىتاتىن جوبالاردى قارجىلاندىرۋ كولەمىن ارتتىرىپ وتىر. جەڭىلدەتىلگەن نەسيە فەرمەرلەرگە قازاقستاننىڭ ازىق-تۇلىك قورىن قامتاماسىز ەتىپ قانا قويماي، اۋىلدا جاڭا تۇراقتى جۇمىس ورىندارىن اشۋعا، ۇلكەن ينۆەستيسيالىق جوبالارمەن جۇمىس ىستەۋگە مۇمكىندىك بەرەدى.

ءقازىر قازاقستاندا بالىق ءوندىرىسى باستى نازارعا الىنىپ وتىر. تامىز ايىندا پرەمەر-مينيستر اسقار مامين قازاقستاندىقتاردى اقۋىزعا باي ازىق-تۇلىكپەن قامتاماسىز ەتۋ ءۇشىن ونى بارلىق وڭىرلەردە دامىتۋدى تاپسىردى. ازىرگە قازاقستاندا بالىقتى تۇتىنۋ كولەمى اسا ۇلكەن ەمەس. (ددۇ-نىڭ بەكىتكەن بالىقتى ورتاشا تۇتىنۋ مولشەرى 16 كگ بولسا، بىزدەگى كورسەتكىش 3-4 كگ قۇرايدى). جاڭادان اشىلعان جانە جۇمىس ىستەپ تۇرعان بالىق شارۋاشىلىقتارىن قولداۋ ەندى باسىمدىققا يە.

وسى تۇرعىدان انك قورجىنىندا اتالعان باعىت بويىنشا 10 جوبا بار. شەتەلدەردەگى بالىققا دەگەن سۇرانىستى ەسكەرسەك، ولاردىڭ بارلىعى ايتارلىقتاي ەكسپورتتىق الەۋەتكە يە.

وسىنداي جوبالاردىڭ ءبىرى – شىعىس قازاقستان وبلىسىنىڭ سامار اۋىلىنداعى "كۋزميچ" ج ش س. ول بەكىرە جانە البىرت بالىقتارىن قوسا العاندا، باعالى بالىق تۇقىمدارىن وسىرۋمەن اينالىسادى. كومپانيا انك-دان كاسىبىن كەڭەيتۋ ماقساتىندا 50 ملن تەڭگە كولەمىندە نەسيە العان. انك-نىڭ شارۋاشىلىقتى قارجىلاندىرۋىنىڭ ارقاسىندا كىشىگىرىم سەحتان اۋىلداعى الەۋمەتتىك دامۋمەن دە، بالىق وسىرۋمەن دە اينالىساتىن ۇلكەن ءوندىرىس ورنىنىڭ دەڭگەيىنە دەيىن جەتىپ وتىر.

كومپانيا 2018 جىلى جەڭىلدەتىلگەن نەسيە بويىنشا قولداۋعا يە بولدى. 2021 جىلعا قاراي جىلىنا 100 توننا بالىق ءوندىرۋدى جوسپارلاپ وتىر.

"ءبىز ونىمدەردى رەسەي، جۇڭگو، ازەربايجان مەن گرۋزياعا دا ەكسپورتتايمىز. ول جەرگە كوكسەركە، شورتان، الابۇعا، تابان بالىقتارىن جىبەرەمىز. قازاقستاندىق ونىمدەر سۇرانىسقا يە. سونىمەن قاتار ولار ءبىزدىڭ دايىن ونىمدەردى – فيلە مەن تارتىلعان ەتتى، جاڭا مۇزداتىلعان بالىقتى دا ساتىپ الادى"، – دەيدى كومپانيا ديرەكتورىنىڭ ورىنباسارى باقىت مۇباراكوۆا.

اگرارلىق نەسيە كورپوراسياسىنا قاتىستى تاعى ءبىر جوبا – "ەلىم-اي كوكپەكتى" شارۋا قوجالىعىنداعى 5 مىڭ ءىرى قارا مالدى بورداقىلاۋ الاڭى. بۇل الاڭ – ەڭ الدىمەن، ايماقتار ءۇشىن جانە شقو-نىڭ شاعىن فەرمەرلىك شارۋاشىلىقتارىن قولداۋ ءۇشىن ماڭىزدى.

اتالعان جوبا 2018 جىلى شارۋا قوجالىعى انك-دان جەڭىلدەتىلگەن نەسيە العان كەزدە باستالعان. مال بورداقىلاۋ الاڭىنىڭ 1 ملرد تەڭگەگە جۋىق قۇنىنىڭ 600 ملن-عا جۋىعى نەسيەگە الىنعان.

"بۇل ايماقتار ءۇشىن جانە شاعىن فەرمالاردىڭ دامۋى ءۇشىن ماڭىزدى، سەبەبى ولار بىزگە ءوز مالدارىن بەرە الادى. ءبىزدىڭ مىندەتىمىز – ونى بورداقىلاۋ جانە ىشكى نەمەسە سىرتقى نارىقتا ساتۋ"، – دەيدى "ەلىم-اي كوكپەكتى" كومپانياسىنىڭ باسشىسى بولات بەكبەردينوۆ.

كومپانيا 300-دەن استام شاعىن فەرمەرلىك شارۋاشىلىقپەن مالدىڭ ەت ونىمدىلىگىن ارتتىرۋ ءۇشىن بۇقالاردى جالعا بەرۋ بويىنشا بىرلەسە جۇمىس ىستەيدى.

سونىمەن قاتار، كوكپەكتى اۋىلىندا مال بورداقىلاۋ الاڭىن قۇرۋ ارقىلى جەرگىلىكتى جۇمىسشىلار ءۇشىن 100-دەن استام جاڭا جۇمىس ورنى اشىلادى. وعان قوسا، كومپانيا الەۋمەتتىك دامۋمەن كوپتەن بەرى اينالىسىپ كەلەدى. مىسالى، قىزمەتكەرلەردىڭ بالالارى ءۇشىن تەگىن بالاباقشا جۇمىس ىستەيدى.

"كۋزميچ" جانە "ەلىم-اي كوكپەكتى" جوبالارىن ىسكە اسىرۋ اۋىلداعى الەۋمەتتىك دامۋ ءۇشىن ماڭىزدى. ويتكەنى، ولار تىكەلەي جانە جاناما تۇردە جاڭا جۇمىس ورىندارىن اشادى. مىسالى، بالىق شارۋاشىلىعىنىڭ كەڭەيۋى 30 جۇمىس ورنىن اشۋعا مۇمكىندىك بەرسە، ال بورداقىلاۋ الاڭى تاعى 150-گە جۋىق جۇمىس ورنىمەن قامتاماسىز ەتەدى. بۇل – شاعىن شارۋاشىلىقتاردا جۇمىسپەن قامتۋداعى ەلەۋلى ۇلەس.