شقو-دا باسشىلىقتان قىسىم كورىپ جاتقانى تۋرالى ۆيدەوۇندەۋ جاريالاعان پوليسەي اتىشۋلى ۆيدەوعا قاتىستى پىكىر ءبىلدىردى. بۇل تۋرالى ول megapolis.kz Instagram پاراقشاسىندا ايتتى.
– مەن ەش وكىنبەيمىن. مەن زاڭ شەڭبەرىندە ارەكەت ەتتىم. ايتاتىنىمنىڭ بارلىعىن ايتتىم، الىپ-قوسارىم جوق، – دەدى ەركەبۇلان مەيرەمبايەۆ.
ونىڭ ايتۋىنشا، قازىرگى ۋاقىتتا ءىستى تەكسەرىپ جاتىر. ناتيجە ءالى بەلگىسىز.
– ماعان قىسىم كورسەتىلىپ جاتقان جوق. ءبارى جاقسى، مەن جۇمىستامىن. سوڭعى كۇندەرى كوبى ماعان قوڭىراۋ شالىپ جاتىر، بىرەۋى قولداسا، بىرەۋى سوگىپ جاتىر. تەلەفوندى قۋاتتاپ ۇلگەرمەي جاتىرمىن. ءبىراق باسشىلىقتان مەنىمەن ەشكىم بايلانىسقا شىقپادى، ەشكىم قىسىم كورسەتكەن جوق، – دەدى ەركەبۇلان مەيرەمبايەۆ تەلەفون ارقىلى.
ەسكە سالا كەتەيىك، بۇعان دەيىن پوليسەي الەۋمەتتىك جەلىدە ۆيدەوۇندەۋ جولداپ، باسشىسى ماس كۇيىندە كولىك جۇرگىزگەنى ءۇشىن 15 تاۋلىككە قاماۋعا الىنعان ادامدى زاڭسىز بوساتۋعا ماجبۇرلەگەنىن ايتقان.
پىكىر قالدىرۋ