ءال-فارابي اتىنداعى قازۇۋ-دىڭ عىلىمي كەڭەسىنىڭ كەڭەيتىلگەن وتىرىسىندا پرەزيدەنت قاسىم-جومارت توقايەۆتىڭ قازاقستان حالقىنا جولداۋى تالقىلاندى، ول رەفورمالاردىڭ نەگىزگى ۆەكتورلارىن جانە قازىرگى جاعدايدا ەلدىڭ ودان ءارى قارىشتى الەۋمەتتىك-ەكونوميكالىق جانە ساياسي دامۋىن ايقىندايدى.
مەملەكەت باسشىسىنىڭ ماڭىزدى جانە ناقتى تاپسىرمالارى، ەڭ الدىمەن، داعدارىسقا قارسى جانە داعدارىستان كەيىنگى شارالاردى ىسكە اسىرۋعا جانە حالىقتىڭ ءال-اۋقاتىنىڭ دەڭگەيىن ارتتىرۋعا باعىتتالعان. قازۇۋ رەكتورى، اكادەميك عالىم مۇتانوۆ جولداۋدا پرەزيدەنت ەكونوميكانى ودان ءارى ءارتاراپتاندىرۋعا، باسەكەلەستىكتى ارتتىرۋعا، شاعىن جانە ورتا بيزنەستى دامىتۋعا، پاندەميانىڭ قيىن كەزەڭىندە حالىققا قاجەتتى قۋاتتى الەۋمەتتىك قولداۋعا ەرەكشە نازار اۋدارعانىن اتاپ ءوتتى.
ول ءبىلىم، عىلىم جانە دەنساۋلىق ساقتاۋ سالاسىن قولداۋ ارقىلى ادامي كاپيتالدىڭ ساپالى ءوسۋى پرەزيدەنتتىڭ ءجىتى نازارىندا ەكەنىن اتاپ ءوتتى. پاندەميانىڭ تارالۋى جاعدايىندا ءبىلىم بەرۋ جۇيەسىنىڭ الدىنا ماڭىزدى مىندەتتەر قويىلۋدا. پرەزيدەنت ۇزدىكسىز ءبىلىم بەرۋ تۇجىرىمداماسىن ازىرلەۋدى، وقىتۋدىڭ بالاما نۇسقالارىن بەلسەندى ەنگىزۋدى جانە كاسىبي داعدىلاردى سەرتيفيكاتتاۋدى، جوعارى وقۋ ورىندارىنىڭ مامانداردى دايارلاۋ ساپاسىنا جاۋاپكەرشىلىگىن ارتتىرۋدى تاپسىردى. قازۇۋ باسشىسى وسىعان بايلانىستى ۋنيۆەرسيتەت تاراپىنان قۇرىلعان moocs.kz اشىق ءبىلىم بەرۋ پلاتفورماسىن حالىقارالىق باسەكەگە قابىلەتتى ساپالى ءارى جاڭا دەڭگەيگە كوتەرۋ مىندەتى تۇرعانىن العا تارتتى.
پرەزيدەنت اتاپ وتكەندەي، كاسىپتىك ءبىلىم بەرۋدە كاسىپكەرلەردىڭ جاڭا بۋىنىن دايىنداۋعا باسىمدىق بەرۋ قاجەت. سوندىقتان «كاسىپكەرلىك نەگىزدەرى» ءپانى ءبىلىم بەرۋدىڭ بارلىق دەڭگەيلەرىندە – مەكتەپتەردەن جوعارى وقۋ ورىندارىنا دەيىن وقىتىلۋى ءتيىس. بۇگىندە قازۇۋ-دا 20-دان استام ستۋدەنتتىك بيزنەس-ينكۋباتور جۇمىس ىستەيدى، وندا 75 ستۋدەنت ستارتاپى مەن يننوۆاسيالىق جوباسى ىسكە اسىرىلۋدا. وقۋ تراەكتورياسى ۋنيۆەرسيتەت بىتىرگەننەن كەيىن تۇلەكتەر جۇمىس ىزدەمەي-اق، شاعىن يننوۆاسيالىق كاسىپورىندار اشۋ ارقىلى وزدەرى جاڭا جۇمىس ورىندارىن قۇرۋعا باعىتتالعان.
جولداۋدا دەنساۋلىق ساقتاۋ باسىم سالا رەتىندە ايقىندالعان. كوروناۆيرۋس پاندەمياسى مەديسيناداعى جۇيەلى ماسەلەلەردى، ونىڭ ىشىندە كاسىبي كادرلاردىڭ تاپشىلىعىن انىقتادى. قاسىم-جومارت كەمەل ۇلى ۇزاق مەرزىمدى بولجام نەگىزىندە مەديسينالىق مەكەمەلەر ءۇشىن كادرلار دايارلاۋدى قامتاماسىز ەتۋدى تاپسىردى. ايتا كەتۋ كەرەك، قازۇۋ وسى باعىتتا بەلسەندى جۇمىس اتقارۋدا جانە جەتەكشى شەتەلدىك جوعارى وقۋ ورىندارىمەن سەرىكتەستىكتە كلاسسيكالىق ۋنيۆەرسيتەت نەگىزىندە العاش رەت قۇرىلعان مەديسينا فاكۋلتەتىندە ماماندار دايارلاۋدى جۇزەگە اسىرۋدا.
عىلىمي كەڭەستىڭ ونلاين-وتىرىسىندا ءسوز سويلەگەن وقىتۋشىلار مەن عالىمدار پرەزيدەنتتى قولداي وتىرىپ، جولداۋ – جۇرگىزىلىپ جاتقان رەفورمالارعا قۋاتتى سەرپىن بەرەتىن ۋاقتىلى جانە مۇقيات زەردەلەنگەن ستراتەگيا ەكەنىن اتاپ ءوتتى. مەملەكەت باسشىسى ۇسىنعان كەشەندى شارالاردى ىسكە اسىرۋ قازىرگى كەزەڭدە ەلدىڭ تۇراقتى دامۋىن قامتاماسىز ەتۋگە جانە الەمدىك قوعامداستىقتا لايىقتى ورىن الۋعا مۇمكىندىك بەرەدى.
تالقىلاۋ قورىتىندىسى بويىنشا قازۇۋ-دىڭ عىلىمي كەڭەسىندە جولداۋدى جۇزەگە اسىرۋ بويىنشا كەشەندى جول كارتاسى قابىلداندى. ول پرەزيدەنتتىڭ تاپسىرمالارىن ورىنداۋدى، ونىڭ ىشىندە عىلىمي زەرتتەۋلەردىڭ ناتيجەلەرىن ناقتى سەكتورعا ەنگىزۋ، «جاسىل» ەكونوميكا مەن IT سالاسىن دامىتۋ، پاندەميا جاعدايىندا ساپالى ءبىلىم بەرۋدى قامتاماسىز ەتۋ جانە ءبىلىم الۋشىلاردا جوعارى كاسىبي قۇزىرەتتەردى قالىپتاستىرۋ، ستۋدەنتتەر مەن وقىتۋشىلاردى الەۋمەتتىك قولداۋ جونىندەگى تاپسىرمالارىن ورىنداۋدى كوزدەيدى.
پىكىر قالدىرۋ