قازاقستاندىق ديزاينەر ءسابيت سىراحاننىڭ  (ءسابيت Bisenء-نىڭ) ولىمىنە قاتىستى الماتى پوليسيا دەپارتامەنتى پىكىر ءبىلدىردى. پوليسياعا 18 قازاندا تۇنگى ۋاقىتتا قوڭىراۋ كەلىپ تۇسكەن، دەپ حابارلادى پوليسيا دەپارتامەنتىنىڭ باسپا ءسوز قىزمەتى.

– "102" پۋلتىنە قوڭىراۋ شالعان ادامنىڭ ايتۋىنشا، ءۇيدىڭ اۋلاسىندا بەلگىسىز ەر ادامدار باستاپقىدا داۋلاسىپ، ارتىنشا توبەلەسكەن. ناتيجەسىندە ولاردىڭ بىرەۋى قۇلاپ، ەكىنشىسى قىلمىس ورنىنان جاسىرىنۋعا تىرىسقان. وقيعا ورنىنا كەلگەن دارىگەرلەر توبى ادامنىڭ ءولىمىن تىركەدى. ونىڭ ءاتى-جونى بىردەن انىقتالدى، ول 1989 جىلعى ب ەسىمدى ەر ادام، – دەدى پوليسيا دەپارتامەنتىندەگىلەر.

قىلمىستى جاسادى دەگەن كۇدىكپەن 1991 جىلعى ەر ادام ۇستالدى. پوليسيا مالىمەتىنشە، كۇدىكتى قىلمىس جاساعانىن مويىنداعان.

كۇدىكتى ۋاقىتشا ۇستاۋ يزولياتورىنا قامالدى.

دەرەكتى بوستاندىق اۋداندىق پوليسيا باسقارماسى قىلمىستىق كودەكستىڭ 99-بابىنىڭ 1-بولىگى ("كىسى ءولتىرۋ") بويىنشا تەرگەپ جاتىر. تەرگەۋ بارىسى الماتى پوليسيا دەپارتامەنتى باسشىلىعىنىڭ باقىلاۋىندا.

18 قازاندا قازاقستاندىق ديزاينەر ءسابيت سىراحاننىڭ قايتىس بولعانى حابارلانعان بولاتىن.

ءسابيت سىراحان – تانىمال streetwear-برەندىنىڭ ديزاينەرى.