قازاقستاندىق قوعامدا داۋلاردى نەگىزىنەن سوت ارقىلى رەتتەۋ كەڭ تارالعانىن تالداۋ ناتيجەلەرى كورسەتىپ وتىر. بۇل ازاماتتار مەن سوتتار ءۇشىن ۇلكەن ماسەلەگە اينالۋدا، تاراپتار ۋاقىتى مەن قاراجاتىن جوعالتىپ، سوت جۇيەسىن اۋىرلاتادى. ستاتيستيكا بويىنشا سوتقا دەيىنگى رەتتەۋ ۇلەسى 2%-دان اسپايدى. 2019 جىلى 2،6 ملن داۋدىڭ 40 مىڭى مەدياسيا ارقىلى شەشىلدى. بۇل تۋرالى ق ر پرەزيدەنتى جانىنداعى ورتالىق كوممۋنيكاسيا قىزمەتى حابارلادى. 

– وسىعان بايلانىستى، مەملەكەت باسشىسى ءوز جولداۋىندا ايتقانداي «سوتتان تىس» جانە «سوتقا دەيىنگى» داۋلاردى رەتتەۋ ينستيتۋتتارىن دامىتۋ قاجەت. بۇل ءوز كەزەگىندە ازاماتتار اراسىندا جانجالدى ۋشىقتىرماي، جۇيكە توزدىرماي،ۋاقىت پەن قارجىنى شىعىنداماي جىلدام شەشۋگە مۇمكىندىك بەرەدى، – دەدى اقپارات جانە قوعامدىق دامۋ ءمينيسترى ايدا بالايەۆا پرەزيدەنتتىڭ حالىققا جولداۋىنىڭ نەگىزگى قاعيدالارىن ءتۇسىندىرۋ جونىندەگى باسپا ءسوز كونفەرەنسياسى بارىسىندا.

اقپارات جانە قوعامدىق دامۋ مينيسترلىگى مەدياسيا ماسەلەسىندە اقش، ۇلىبريتانيا، گەرمانيا، شۆەيساريا سياقتى الدىڭعى قاتارلى ەلدەردىڭ ۇزدىك داستۇرلەرىنە سۇيەنۋگە نيەتتى.