پرەمەر-مينيستر اسقار مامين مەملەكەت باسشىسى قاسىم-جومارت توقايەۆقا سانيتارلىق-ەپيدەميولوگيالىق جاعدايدى تۇراقتاندىرۋ ءۇشىن قابىلدانىپ جاتقان شارالار جانە ەلدىڭ الەۋمەتتىك-ەكونوميكالىق دامۋىنىڭ وزەكتى ماسەلەلەرى تۋرالى ايتتى. بۇل تۋرالى اقوردا سايتى مالىمدەدى.

اسقار مامين پرەزيدەنتكە ەلدەگى سانيتارلىق-ەپيدەميولوگيالىق جاعدايدىڭ باقىلاۋدا ەكەنىن جەتكىزدى.

سونداي-اق كوروناۆيرۋس ىندەتىنىڭ جاڭا تولقىنىنا دايىندىق جۇمىستارى اياسىندا جۇزەگە اسىرىلىپ جاتقان شارالار تۋرالى دا مالىمەت بەردى. اتاپ ايتقاندا مەديسينالىق ۇيىمدار مەن حالىقتى دارى-دارمەكپەن قامتاماسىز ەتۋ، ەمدەۋ نىساندارىنا جاساندى تىنىس بەرۋ اپپاراتتارى مەن وتتەگى كونسەنتراتتارىن جەتكىزۋ، ايماقتاردى جىلجىمالى دياگنوستيكالىق كەشەندەرمەن، سيفرلىق رەنتگەن-اپپاراتتارمەن، ءموبيلدى توپتارمەن جانە جەدەل مەديسينالىق كومەك كورسەتۋ كولىكتەرىمەن جابدىقتاۋ جۇمىستارى جۇرگىزىلىپ جاتقانىن ايتتى.

ونىڭ ايتۋىنشا، قازىرگى ۋاقىتتا 13 ايماقتىڭ 10-ىندا مودۋلدىك جۇقپالى اۋرۋحانالاردىڭ قۇرىلىسى اياقتالعان، قالعان 3 نىسان وسى جىلدىڭ قاراشا ايىنىڭ سوڭىنا دەيىن پايدالانۋعا بەرىلەدى.

سونىمەن قاتار مينيستر توقايەۆقا رەسپۋبليكالىق جانە ايماقتىق تۇراقتاندىرۋ قورلارىنىڭ قۇرىلعانى جانە دەنساۋلىق ساقتاۋ جۇيەسىنە ارنالعان 91 ءتۇرلى دارى-دارمەك پەن جەكە قورعانىش قۇرالدارىنىڭ ەكى ايلىق قورى جاساقتالعانى تۋرالى اتاپ ءوتتى.

ونىڭ سوزىنشە، دارى-دارمەكتەردىڭ تاپشىلىعىن بولدىرماۋ ءۇشىن ءدارىحانالاردىڭ بولشەك ساۋدا جۇيەسىندە سۇرانىسقا يە 33-تەن استام پرەپارات قورى قوسىمشا جاساقتالۋدا. 

اسقار مامين قاسىم-جومارت توقايەۆقا پتر تەست سىنامالارىن الۋ كولەمىن ارتتىرۋ جۇمىستارى تۋرالى  دا ايتتى.

ونىڭ سوزىنشە، زەرتحانالار سانى 124-كە دەيىن كوبەيىپ، تەستىلەۋ قۋاتى تاۋلىگىنە 66 مىڭعا دەيىن جەتتى. بۇل رەتتە، تۇرعىنداردى تەست سىنامالارىمەن قامتۋ 2،5 ەسە ۇلعايتىلىپ، پتر تەست سىنامالارىن الۋ قۇنى تومەندەتىلدى.

بۇدان بولەك، اسقار مامين پرەزيدەنتكە شەكارالىق وتكىزۋ بەكەتتەرىندە، سونداي-اق، كولىكتىڭ بارلىق تۇرلەرى مەن ينفراقۇرىلىمدارىندا سانيتارلىق-ەپيدەميولوگيالىق باقىلاۋدىڭ كۇشەيتىلگەنى تۋرالى باياندادى.

سونىمەن قاتار وڭىرلەردەگى بيزنەس سۋبەكتىلەرىنىڭ جۇمىسى بىرتىندەپ قايتا قالپىنا كەلتىرىلىپ جاتقانىن جەتكىزدى.

پرەزيدەنت كوروناۆيرۋس پاندەمياسىنىڭ الداعى ايلارداعى تارالۋىنا قاتىستى دۇنيەجۇزىلىك دەنساۋلىق ساقتاۋ ۇيىمىنىڭ پەسسيميستىك بولجامدارىن ەسكەرىپ، ۇكىمەت بەلگىلەگەن جوسپاردىڭ مۇلتىكسىز ورىندالۋىنىڭ ماڭىزدى ەكەنىن اتاپ ءوتتى.