الەۋمەتتىك جەلىدە اتىراۋ وبلىسى قاراباتان اۋىلىنداعى زاۋىتقا ءبىر توپ جۇڭگو ازاماتتارىنىڭ كەلىپ جاتقان ۆيدەوسى تارادى. بەينەجازباعا قاتىستى اتىراۋ وبلىسى بويىنشا مەملەكەتتىك ەڭبەك ينسپەكسياسى باسقارماسىنىڭ باسشىسى يگىلىك اۋباكىروۆ تۇسىنىك بەردى، دەپ حابارلادى اق جايىق وڭىرلىك گازەتى.
وبلىستىڭ باس ەڭبەك ينسپەكتورىنىڭ ايتۋىنشا، 22 قازاندا "CNCEC" (China National Chemical Enginnering Co) كومپانياسىنىڭ 124 قىتايلىق مامانى ينتەگراسيالانعان گاز-حيميا كەشەنىنىڭ I فازاسى جوباسىندا جۇمىس ىستەۋ ءۇشىن نۇر-سۇلتاننان اتىراۋعا چارتەرلىك رەيسپەن كەلگەن.
كەشكى ۋاقىتتا كەلگەن قىتايلىق جۇمىسشىلار CNCEC ۆاحتالىق قالاشىعىنا قونىستاندى. ءدال وسى ءساتتى قازاقستاندىق قىزمەتكەرلەر ۆيدەوعا تۇسىرگەن.
– اتالعان فاكتى بويىنشا CNCEC فيليالى جانە KPI ج ش س (جوبانىڭ تاپسىرىس بەرۋشىسى) قاۋىپسىزدىك قىزمەتىنىڭ قىزمەتكەرلەرى بەينەجازبانى تۇسىرگەن ادامدارمەن سويلەستى. ولار بەينەجازبانى تۇسىرگەندە ارام ويىمىز بولعان جوق دەگەن، – دەدى يگىلىك اۋباكىروۆ.
ەڭبەك ينسپەكسياسى باسقارماسى قىتايلىق ازاماتتار قازاقستانعا ىسكەرلىك ۆيزا بويىنشا كەلگەنىن جانە شەتەلدىك جۇمىس كۇشىن تارتۋعا رۇقسات الۋ بويىنشا ساناتقا جاتپايتىنىن اتاپ ءوتتى.
ينتەگراسيالانعان گاز-حيميا كەشەنىنىڭ I كەزەڭى جۇڭگو دامۋ بانكىنىڭ اقشاسىنا سالىنىپ جاتقان قاراباتانداعى پوليپروپيلەن وندىرەتىن زاۋىت. جوبا مەردىگەرى CNCEC كومپانياسى.
پىكىر قالدىرۋ