بۇگىن 20 شاقتى قازاقستاندىق الماتىداعى اقش-تىڭ باس كونسۋلدىعى الدىنا جينالىپ، "بورات 2" ءفيلمىنىڭ كورسەتىلمەۋىن تالاپ ەتتى. ولار "امەريكادا تۇراتىن قازاقتاردى قورلاۋ توقتاتىلسىن"، "قۇلاپ جاتىپ سۇرىنگەنگە كۇلمە" دەپ جازىلعان پلاكاتتار ۇستاپ شىقتى.
بەلسەندىلەر قازاق، اعىلشىن، ورىس تىلىندە جازىلعان پلاكاتتارمەن قوسا تابىت الىپ كەلگەن. وندا "ءوز وتانىندا جەرلەنسىن" دەپ جازىلعان. 20 شاقتى ادام پەتيسياعا قول قويىپ، ونى اقش كونسۋلدىعىنىڭ وكىلىنە تاپسىرۋدى جوسپارلاعان. الايدا بەلسەندىلەرمەن جۇزدەسۋگە ەشكىم شىقپادى.
بۇعان دەيىن "نامىس" قوزعالىسىنىڭ جاستارى الماتىداعى اقش كونسۋلدىعىنىڭ الدىنا جينالىپ، نارازىلىق حاتىن تاپسىرعان.
"بورات 2" ءفيلمىنىڭ ترەيلەرى جارىق كورگەندە قازاقستاندىقتار مەن شەتەلدەگى قازاقتار ءتۇرلى رەاكسيا ءبىلدىردى. ءبىرى "فيلمگە كوپ كوڭىل ءبولۋ ارقىلى وعان جارناما جاسايمىز" دەپ حالىقتى سابىرعا شاقىرسا، ەندى ءبىرى ۇلتتىق نامىستىڭ تاپتالعانىن ايتىپ، ءفيلمنىڭ كورسەتىلۋىنە قارسى پەتيسياعا قول قويدى. ال ءۇشىنشى تاراپ "فيلم ارقىلى قازاق قوعامىنىڭ وسال تۇسى ارزان كۇلكى ارقىلى كورسەتىلىپ وتىر" دەگەن پىكىردە.
پىكىر قالدىرۋ