پرەزيدەنت، قارۋلى كۇشتەردىڭ جوعارعى باس قولباسشىسى قاسىم-جومارت توقايەۆ قورعانىس ءمينيسترى نۇرلان ەرمەكبايەۆتىڭ قازاقستان قارۋلى كۇشتەرىنىڭ نەگىزگى دامۋ باعىتتارى جونىندەگى بايانداماسىن تىڭدادى. بۇل تۋرالى اقوردا سايتى حابارلادى.
رەسمv سايتتىڭ مالىمەتىنشە، كەزدەسۋ بارىسىندا قازاقستان ارمياسىنىڭ ينفراقۇرىلىمى مەن ماتەريالدىق-تەحنيكالىق بازاسىن جەتىلدىرۋدىڭ پەرسپەكتيۆالارى جانە اسكەردى ۇشقىشسىز باسقارىلاتىن ۇشۋ اپپاراتتارى، اۋە شابۋىلىنا قارسى قورعانىس قۇرالدارى سىندى زاماناۋي قارۋ-جاراق تۇرلەرىمەن جابدىقتاۋ ماسەلەلەرى قاراستىرىلعان.
قورعانىس ءمينيسترى پرەزيدەنتكە حالىقارالىق اسكەري ىنتىماقتاستىق پەن بىتىمگەرشىلىك ءىس-قيمىلداردىڭ احۋالى تۋرالى اقپارات بەردى. سونداي-اق ول اسكەري قىزمەتشىلەردىڭ تۇرمىستىق جانە الەۋمەتتىك جاعدايىن جاقسارتۋ، ولاردى ساپالى كيىم-كەشەكپەن قامتاماسىز ەتۋ جۇمىستارى جونىندە ايتتى.
جوعارعى باس قولباسشى تالقىلانعان ماسەلەلەردىڭ وزەكتىلىگىن ەسكەرە وتىرىپ، قورعانىس مينيسترلىگىنىڭ اسكەري القا وتىرىسىن ۇيىمداستىرۋعا تاپسىرما بەردى. جيىندا 2020 جىلعى اسكەري دايىندىقتىڭ قورىتىندىلارى جاسالىپ، الداعى كەزەڭدە اتقارىلاتىن مىندەتتەر ايقىندالادى.
پىكىر قالدىرۋ