اباي اتىنداعى قازاق مەملەكەتتىك اكادەميالىق وپەرا جانە بالەت تەاترىندا «قازاق ءۆالسىنىڭ كورولى» ءشامشى قالداياقوۆتىڭ 90 جىلدىعىنا ارنالعان «ءشامشى الەمى» اتتى كونسەرت ءوتتى.

كونسەرت اباي اتىنداعى مەملەكەتتىك وپەرا جانە بالەت تەاترىنىڭ سيمفونيالىق وركەسترىنىڭ سۇيەمەلدەۋىمەن ءوتتى. ديريجەر - كومپوزيتوردىڭ ۇلى مۇحتار قالداياقوۆ بولدى.

«مەن وتە باقىتتىمىن. بۇگىن مەن 15 جاسار بالا كەزىمدى ەسىمە ءتۇسىردىم. اكەمنىڭ 50 جاسىنا ارنالعان كونسەرتتى وسى تەاتردىڭ امفيتەاترىندا تاماشالاعانمىن. مىنە، ودان بەرى 40 جىل ءوتىپتى. ال وسى ونەر ورداسىنا ديريجەر بولىپ كەلگەنىمە – 25 جىل. بۇگىن مەنىڭ بالالارىم ساحنادا ونەر كورسەتتى، وتە قۋانىشتىمىن. ءان كەشىنە كەلەر بولسام، ءبىز باعدارلاما بويىنشا الماتى قالاسى اكىمىنىڭ ەسترادالىق-سيمفونيالىق وركەسترىنىڭ جەتەكشىسى، ق ر ەڭبەك سىڭىرگەن ونەر قايراتكەرى الەكساندر بەلياكوۆپەن جانە بەلگىلى كومپوزيتور رينات عايسينمەن جۇمىس ىستەدىك»، - دەيدى مۇحتار قالداياقوۆ.

كورەرمەن 50-60 جىلدارداعى الماتىنىڭ رەترو اتموسفەراسىنا كۋا بولدى. اباي اتىنداعى مەملەكەتتىك وپەرا جانە بالەت تەاترىنىڭ ۇزدىك سوليستەرى كومپوزيتوردىڭ جيىرمادان استام ءانىن ورىندادى. اتاپ ايتقاندا «ءانىم سەن ەدىڭ»، «كەشىكپەي كەلەم دەپ ەن»، «اق بانتيك»، «قايداسىڭ»، «باقىت قۇشاعىندا»، «مەنىڭ قازاقستانىم» جانە باسقا اندەر.

اباي اتىنداعى مەملەكەتتىك اكادەميالىق وپەرا جانە بالەت تەاترىنىڭ ءسوليسى گۇلزات داۋربايەۆا ستۋدەنتتىك شاعىندا ءشامشى قالداياقوۆ اتىنداعى ءان فەستيۆالىنىڭ لاۋرەاتى بولعانىن ايتتى.

«بۇگىن مەن ءشامشى اعانىڭ ەكى ءانىن ورىندادىم. كومپوزيتور مۇراسى ءارقايسىمىزدىڭ جۇرەگىمىزدە. ستۋدەنت كەزىمدە ماعان ءشامشى اعانى كورۋ باقىتى بۇيىردى. ول كىسى ماعان باتاسىن بەرگەن. كومپوزيتوردىڭ 90 جىلدىعىنا ارنالعان كونسەرتتە حالىقتىڭ جۇرەگىنەن ماڭگىلىك ورىن العان اندەر شىرقالدى. ونىڭ ارتىندا تالانتتى ۇرپاق قالعانىنا قۋانىشتىمىن «، - دەيدى ءانشى.

بارلىق قۇقىقتار قورعالعان. inform.kz بەلسەندى سىلتەمەنى پايدالانىڭىز https://www.inform.kz/kz/almatyda-shamshi-kaldayakovtyn-90-zhyldygyna-arnalgan-an-keshi-otti_a3707448