ارمەنيادا ۇلتتىق قاۋىپسىزدىك قىزمەتىنىڭ بۇرىنعى ديرەكتورى ارتۋر ۆانەسيان پرەمەر-مينيستر نيكول پاشينيانعا قاستاندىق جاساماق بولدى دەگەن كۇدىكپەن ۇستالدى. اقپاراتتى ۆانيسياننىڭ ادۆوكاتى لۋسين سااكيان راستاعان. بۇل تۋرالى ria.ru حابارلادى.
– ۆانەسيان ۇلتتىق قاۋىپسىزدىك قىزمەتىنىڭ تەرگەۋ بولىمىنە شاقىرىلىپ، "قارۋدى زاڭسىز الۋعا، ساتۋعا، ساقتاۋعا قاتىسۋ"، "بيلىكتى باسىپ الۋعا دايىندىق"، "ءبىر توپ ادام الدىن-الا كەلىسىپ جاساعان مەملەكەت، ساياسي نەمەسە قوعام قايراتكەرىن ولتىرۋگە دايىندىق" باپتارى بويىنشا ىس-ارەكەتتەر جاسادى دەگەن كۇدىكپەن ۇستالدى، – دەپ جازدى ادۆوكات Facebook-تە.
ادۆوكات بۇل وقيعانى ساياسي قۋدالاۋ دەپ ايىپتاپ وتىر.
ۇقك-نىڭ بۇرىنعى باسشىسى وپپوزيسيالىق "رودينا" پارتياسىن باسقارادى جانە پرەمەر-مينيستردىڭ وتستاۆكاعا كەتۋىن تالاپ ەتەتىن نارازىلىق اكسيالارىنا قاتىسقان. بەلگىلى بولعانداي، بۇگىن ونىڭ اتا-اناسىنىڭ ۇيىندە ءتىنتۋ جۇمىستارى جۇرگىزىلگەن.
ەريەۆاندا بىرنەشە كۇننەن بەرى وپپوزيسيانىڭ نارازىلىق اكسيالارى ءوتىپ جاتىر، ولار پاشينياننىڭ قاراباقتا اتىستى توقتاتۋ تۋرالى كەلىسىمگە قول قويۋىنا بايلانىستى وتستاۆكاعا كەتۋىن تالاپ ەتۋدە.
پىكىر قالدىرۋ