بۇگىن ساياساتكەر، وپپوزيسيالىق "دات" گازەتىنىڭ جەتەكشىسى ەرمۇرات ءباپيدىڭ ۇستالىپ، الماتىداعى مەدەۋ اۋداندىق پوليسيا بولىمىنە جەتكىزىلگەنى حابارلانعان. جۋرناليست پوليسيا بولىمىنەن شىققاننان كەيىن وزىنە ازاماتتىق بەلسەندى دۋلات ءاعادىلدىڭ ۇلى جانبولات ءاعادىلدىڭ ونلاين-جانازاسىنا قاتىسقانى ءۇشىن ايىپ تاعىلىپ، ءىس قوزعالىپ جاتقانىن facebook پاراقشاسىندا ءمالىم ەتتى. تومەندە جۋرناليست جازباسىنىڭ تولىق ءماتىنى ۇسىنىلىپ وتىر.
"پوليسيا نە سەبەپپەن ۇستادى؟" دەگەن فرەندوستاردىڭ سۇراعىنا ەندى عانا جاۋاپ بەرۋگە مۇرشا بولىپ جاتىر. 23 جىلعى وپپوزيسيالىق ويراندا جۇيكە جۇقارعان، ال نەرۆىنىڭ نەگىزىندە ويانىپ كەتەتىن حروني-سىرقاتتار بولادى. سونىڭ ءبىرى سىر بەرىپ، جەلىگە جەتە الماي جاتىر ەدىم...
ونىڭ ۇستىنە، مۇنداي "ۇساق-تۇيەكتەن" جارناما جاساپ قالاتىن جاساڭ جانە جاڭا بەلسەندىنىڭ جەلپىلدەگەن زامانىنان باياعىدا-ا-ا ءوتىپ كەتكەنبىز. "اقىر شىققان ءورت ەكەن، باس-سيراق ءۇيتىپ الا قويايىن" دەيتىن ەمەس... ءۇش رەت قىلمىستىق، ونعا جۋىق ازاماتتىق، سانى سانادا قالماعان اكىمشىلىك سوتتان وتكەن سوڭ، ويبايلاۋدىڭ ءوزى ۇيات.
ءبىراق بۇل جولعى پوليسيالىق-كنبلىق ۇستاۋدىڭ حيكاياسى قىزىق بولدى. باۋىرىمنىڭ ءۇيىنىڭ الدىنا كولىگىمدى تەجەگەنىم سول ەدى، سوڭىمنان سالىپ ۇرىپ ءۇش پوليساي مەن ءبىر "كنبشى" كىساپات جەتىپ كەلدى. مىنگەندەرى جەكە مەنشىك ءنومىرلى ماشينا. ءاي-شاي جوق: "سىزگە قاتىستى ءىس قوزعالدى، بىزبەن بىرگە مەدەۋ اۋداندىق پوليسياسىنا باراسىز!" دەيدى.
"نەگە بارام؟ ول قانداي ءىس؟".
"بارعان سوڭ بىلەسىز...".
"پوۆەستكا قايدا؟!".
"بارعان سوڭ الاسىز...".
"ءىس قوزعالعانى تۋرالى قاۋلى قايدا؟"
"بارعان سوڭ بەرەدى...".
"كىم بەرەدى؟!".
"تەرگەۋشى...".
"قولىما شاقىرتۋ بەرىلمەي، ەشقايدا بارمايمىن!".
سويتكەنىم سول ەكەن، اق كۇرتەلى (سۋرەتتە) "كنبشى" بىلەگىمنەن تاس قىپ قىسىپ، سۇيرەپ الا جونەلمەك. "ءپاترۋلدى شاقىر!" دەپ، قوجايىندىق قالىپپەن پوليسيانىڭ ۇشەۋىنە كوماندا بەرىپ قويادى. ونداعىسى - مەنى قورقىتقان ءتۇرى. ءپاترۋلسىز-اق تورتەۋى سۇيرەي جونەلسە، قارسىلىق قىلار قايلام قايسى؟!
"ءپاترۋلدى شاقىر" دەگەنى - قارا حالىقتى قورقىتۋدىڭ امالىنا ابدەن ماشىقتانعان ماڭقانىڭ قىلىعى. اۋماعان سۇمەلەك!
ايتپاقشى، بۇرىندارى "كنب"-عا ادامي جانە اناليتيكالىق اقىلى بار ادامدى الۋشى ەدى. بۇگىنگى جەمقورلىق-سىبايلاستىق جۇيە وڭشەڭ توپاس-تۋپويدى جينايتىن بوپتى. پارا بەرسەڭ - الا بەرەدى! مىناۋ "كنبشى" سول توپاستىقتىڭ تولىق ەتالونى ەكەن. قىلمىستىق كودەكسىنىڭ 318-2 بابىمەن - "ق ر پرەزيدەنتىنىڭ ار-وجدانىنا نۇقسان كەلتىرگەنى ءۇشىن" ءبىر سوتتالىپ (2002ج)، "سولدات" گازەتىندە "قازاقگەيت" (ن.نازاربايەۆتىڭ ۇرلىعى) سكاندالى ءۇشىن ەكى سوتتالعان (2002ج)، "اۆتوريتەتنىي ۆور" اتانۋعا اتتام قالعان ادامدى "نا پۋشكۋ" قورقىتام دەپ ويلاعان ەكەن! كنب بولماق تۇگىلى، كاريم ماسيموۆتىڭ ءوزى بوپ كەتسە دە، ونداي ماندامعا مويىنسۇناتىن مەن بە؟!
اقىرى نە كەرەك، جوعارىنىڭ جارلىعىن ورىنداعان پارىقسىز پوليسايلارعا دىرىلداتىپ سۇيرەتپەس ءۇشىن، مەدەۋ پب-سىنا ءوزىم باردىم. ارينە توپاس "كونتورشى" باستاعان پوليسيا قاراۋىلى مەنى باعىپ كەلدى.
باسقارمادا ءبىر ءتۇبىتمۇرت تۇسىنىك جاز دەيدى.
"نە ءۇشىن، نە دەپ؟".
"كەشەگى رۇقسات ەتىلمەگەن ميتينگىگە قاتىسقانىڭىز ءۇشىن...".
"رۇقسات بەرۋ-بەرمەۋ تۋراسىنداعى باپ "توقايەۆتىق پوپراۆكادا" جوق ەكەنىن بىلەسىڭ بە؟!".
"بىلمەيمىن... ماعان وسىلاي جازدىر دەدى...".
"كىم ول، قاي اقىماق رۇقسات ەتىلمەگەن ميتينگىگە قاتىستى دەپ جۇرگەن؟ ميتينگكە "ۋۆەدوميتەلنىي" كەلىسىم عانا كەرەك دەگەن توقايەۆ قول قويعان زاڭعا قارسى شىعىپ جۇرگەن قاي جارىمەس؟!".
"بايقاپ سويلەڭىز!..".
"سىزگە تاپسىرما بەرگەن، مەملەكەتتىڭ زاڭىن بىلمەيتىن باستىعىڭدى جارىمەس دەمەگەندە، كىم دەيمىز؟!".
وسىنداي تاجىكەدەن كەيىن، مەن ءوز نۇسقامدا تۇسىنىك جازىپ بەردىم. تۇسىنىك تەكتەس ول جازبانىڭ مازمۇنى قالا اكىمىنىڭ اتىنا بەرىلگەن حابارلامادا كورسەتىلگەن (فوتوكوشىرمەنى قاراڭىز).
قىسقاسى، ءبىزدىڭ ءبىر توپ بەلسەندى ازامات ءھام يماندى مۇسىلمان دۋلات ءاعادىلدىڭ جۇمباق جاعدايدا قازا بولعان ۇلى - جانبولاتتىڭ قاسيەتتى جۇمادا استانادا وتكەن جانازا-دۇعاسىنا الماتىدا ونلاين قول جايۋعا جينالعان ەدىك. مىنە، ماسيموۆتىق ماستەرلەر مەن "كىتاپحانالىق" كىرىپتارلار سول يسلامي ءراسىمدى "رۇقسات ەتىلمەگەن ميتينگى" دەگەن ءمانىس شىعارىپتى. مەن سول "رۇقساتسىز" جيىنعا قاتىسىپپىن (؟). سوندا دەيمىن-اۋ، ونلاين-جانازاعا جينالعان ەلۋ شاقتى مۇسىلمان بالاسىنىڭ اراسىندا قۇداباي قارجاۋ باۋىرىم ەكەۋىمىزدى "ەرەك ەلەپ-ەسكەرگەندەرى" قالاي؟
ايتپاقشى، ەشقانداي تەرگەۋ دە بولمادى، تەرگەۋشىنى كورمەدىم. مەن جازعان تۇسىنىكتەمەنى تىگىپ، كاپيتانى بار، لەيتەنانتى بار ءبىر توپ پوليساي وزدەرى پروتوكول قاتتاپ، ءبيتتىڭ قابىعىنداي ءىس دايىنداپ قويدى. دۇيسەنبىدەگى سوتتا قارا جىپپەن كوكتەلگەن سول ءىس قارالادى.
ال سوت جارىقتىق مەنىڭ ونلاين وي-پىكىرىمدى تىڭداي ما، جانبولاتتىڭ جانازاسىن ميتينگىگە بالاي ما - ول جاعى سۋديانىڭ ساۋداسىنداعى سىڭاي بولادى. البەتتە، "كىتاپحانا" مەن كنب-نىڭ تاپسىرماسىمەن تاپتىشتەلگەن ىستە سوت نوتاريۋستىق نۇسقاداعى قىزمەتتەن اسىپ كەتە المايتىن ەدى، بۇ جولى بۇل "بۇلبۇل" نەدەي ۇكىمدى ۇندەيدى - ول دا زاڭنان بۇرىن، ار-ۇياتتىڭ باعامىنا ساي شارۋا بولسا كەرەك...
بىزدىكى نە كورمەگەن باس: تاعى بىرەۋىن تاعدىردىڭ سالعانىنا، نازاربايەۆتىق رەجيمنىڭ نايساپتىعىنا نەعىلامىز-داعى... باستىسى - باس امان بولسىن، قالعانىن كەيىن كەلىستىرىپ كورەرمىز...
راحمەت، اعايىن!
پىكىر قالدىرۋ