جەكسەنبى كۇنى (15 قاراشادا) مولدوۆا رەسپۋبليكاسىندا پرەزيدەنت سايلاۋىنىڭ ەكىنشى كەزەڭى ءوتتى. سايلاۋدا بۇرىنعى پرەمەر-مينيستر، ارەكەت جانە ىنتىماقتاستىق پارتياسىنىڭ باسشىسى مايا ساندۋ جەڭىسكە جەتتى. بۇل تۋرالى iz.ru سايتى حابارلادى. 

ءبىرىنشى كەزەڭدە دە ساندۋ 36،16% جيناپ باسىمدىققا يە بولعان، بۇل كەزدە رەسپۋبليكانىڭ قازىرگى پرەزيدەنتى يگور دودون 32،61% داۋىس جينادى. كەشەگى ەكىنشى كەزەڭدە ەل ىشىندەگى سايلاۋ ۋچاسكەلەرىندەگى حاتتامالاردى 100% ساناعاننان كەيىن مايا ساندۋ 56،28% داۋىسقا يە بولدى. ال دودونعا سايلاۋشىلاردىڭ 43،72%-ى داۋىس بەرگەن. 

ورتالىق سايلاۋ كوميسسياسىنىڭ مالىمەتتەرى بويىنشا، ساندۋ ورحەي قالاسىندا 70،28% (دودون 29،72%)، سونداي-اق كريۋلەني، ستراسەني، كالاراسي جانە ۋنگەني سياقتى ءىرى قالالاردا سەنىمدى تۇردە جەڭىسكە جەتكەن. دودونعا ەلدىڭ سولتۇستىك بولىكتەرى مەن پريدنەستروۆە (85%-دان استامى) داۋىس بەردى. كيشينيەۆتە ساندۋعا 59،54%، دودونعا 40،46% داۋىس بەردى. 

ءوزىنىڭ جەڭىسى تۋرالى پىكىر بىلدىرگەن مايا ساندۋ پرەزيدەنت رەتىندە قوعامدى بىرىكتىرۋ مەن ەكونوميكانى قالپىنا كەلتىرۋگە كۇش جۇمساۋ كەرەگىن اتاپ ءوتتى.

مايا ساندۋ دجون كەننەدي اتىنداعى گارۆارد مەملەكەتتىك باسقارۋ ينستيتۋتىن بىتىرگەن جانە ەكى جىل بويى ۆاشينگتونداعى دۇنيەجۇزىلىك بانكتىڭ اتقارۋشى ديرەكتورىنىڭ كەڭەسشىسى بولعان. كيشينيەۆتىڭ ەو جانە ناتو-مەن جاقىنداسۋىن قولدايدى.