اتىراۋدا جاپپاي توبەلەس كەزىندە قايتىس بولعان گرەپپلينگتەن ازيا چەمپيونى ەسەنبەك سيعۋاتوۆتىڭ تۋىستارى تەرگەۋ امالدارىنىڭ باياۋ ءجۇرىپ جاتقانىنا الاڭداۋلى. بۇل تۋرالى azh.kz سايتى حابارلادى.

تۋىستارىنىڭ ايتۋىنشا، وقيعاعا سۋ پوليسياسى ەكى قىزمەتكەرىنىڭ قاتىسى بار. الايدا پوليسيا دەپارتامەنتى پوليسەيلەردىڭ بۇل قىلمىسقا قاتىسى جوعىن مالىمدەگەن.

بۇعان دەيىن گرەپپلينگتەن ازيا چەمپيونى اتىراۋلىق ەسەنبەك سيعۋاتوۆ جۇرەگىنەن وق جاراقاتىن الىپ، وقيعا ورنىندا جان تاپسىرعانى حابارلانعان. وقيعا 9 تامىزعا قاراعان ءتۇنى قالا ماڭىنداعى دامبا مەن قۇرمانعازى اۋىلدارىنىڭ ماڭىندا بولعان.

– مەنىڭ ۇلىم قايتىس بولعانىنا 3 اي ءوتتى. ءبىراق تەرگەۋ وتە باياۋ ءجۇرىپ جاتىر. بۇل ءىس بويىنشا ەكى ادام قاماۋعا الىندى. بىرەۋى مەنىڭ ۇلىما وق اتقان، ەكىنشىسى قاقتىعىس بولعان جەرگە قارۋ الىپ كەلدى. الايدا بۇل توبەلەستى ۇيىمداستىرعان 17 جاستاعى جىگىت بوستاندىقتا ءجۇر. نەلىكتەن؟ مەن بۇل ءىس بويىنشا ىشكى ىستەر مينيسترلىگىنە حابارلاسامىن، – دەدى مارقۇمنىڭ اكەسى توقسانباي ورازعالي. 

توقسانباي ورازعاليدىڭ ايتۋىنشا، ۇلدارىنىڭ ولىمىنە كۇدىكتى ەكى پوليسەي دە سۋدا جۇمىس ىستەگەن. 

– ءبىزدىڭ اۋىلدىڭ بالالارى كورشى قۇرمانعازى اۋىلىنىڭ دۇكەنىنە بارعاندا، اۋىل بالالارى ولاردى ۇرىپ-سوققان. بالالار ءبىزدىڭ ۇلىمىزعا جانە باسقا بالالارعا شاعىمدانعان. ەسەنبەك سولارمەن بىرگە قۇرمانعازىعا دا بارعان. ولار توبەلەسۋدى قالاماعان، شۋدىڭ نە سەبەپتەن باستالعانىن انىقتاماق بولعان. ءبىراق ولار ەسەنبەكتىڭ جۇرەگىنە وق اتقان. مەن سول ءتۇنى ناماز وقۋعا دايىندالىپ جاتقانىمدا، ۇيگە ەسەنبەكتىڭ دوستارى كەلدى. "ەسەنبەككە وق اتىلدى، ءبىز ودان ايىرىلىپ قالدىق" دەدى. بار ءۇمىتىمىز بولعان بالامىز ەدى عوي. سەنە المادىق... – دەيدى ول.

"اتالعان دەرەك بويىنشا سوتقا دەيىنگى تەرگەۋ جالعاسىپ جاتىر. ساراپتامالاردىڭ ناتيجەلەرى كۇتىلۋدە، قورىتىندىسى بويىنشا قىلمىستىق ءىس سوتقا جىبەرىلەدى" دەپ جاۋاپ بەرگەن پوليسيا دەپارتامەنتى رەداكسيا ساۋالىنا.