ەلوردا ءدامحاناسىنداعى جارىلىستان كەيىن ءۇش ادام جانساقتاۋ بولىمىنە ءتۇستى. بۇل تۋرالى قالالىق دەنساۋلىق ساقتاۋ باسقارماسىنىڭ باسپا ءسوز قىزمەتى حابارلادى.

باسپا ءسوز قىزمەتىنىڭ مالىمەتىنشە، ولاردىڭ ءبىرى اسا اۋىر جاعدايدا جاتسا، ەكەۋىنىڭ اۋىر جاعدايى اۋىر دەپ باعالانۋدا. بارلىعى 23 ادام № 1 جانە №2 كوپسالالى اۋرۋحانالارعا جاتقىزىلدى. جەڭىل جاراقات العان 11 جابىرلەنۋشى امبۋلاتوريالىق ەمدەلۋگە جىبەرىلدى.

"نەگىزىنەن ناۋقاستار ءتۇرلى دارەجەدەگى تەرميالىق كۇيىكتەرمەن، ورتاشا دەڭگەيدەگى ۋلى گازبەن ۋلانۋمەن، جاراقاتتارمەن اۋرۋحاناعا جاتقىزىلدى. ءبىر ناۋقاس جامباس سۇيەگىنىڭ جابىق سىنۋىمەن تراۆماتولوگيا بولىمىندە جاتىر. قالعاندارىنىڭ بارلىعى كومبۋستيولوگيا بولىمىندە. ولاردىڭ جاعدايى ورتاشا اۋىر، اسقىنۋسىز" دەلىنگەن ۆەدومستۆو تاراتقان حابارلامادا.

21 قاراشادا ەلوردا ءدامحانالارىنىڭ بىرىندە جويقىن جارىلىس بولىپ، ءبىر ادام قازا بولعان.

قازىرگى ۋاقىتتا اتالعان فاكت بويىنشا قىلمىستىق كودەكستىڭ 292-بابى 2-تارماعى بويىنشا (ابايسىزدا ادام ءولiمiنە نەمەسە وزگە دە اۋىر زارداپتارعا اكەپ سوققان ىس-ارەكەت) سوتقا دەيىنگى تەرگەۋ جۇمىستارى باستالدى.

ەلوردا اكىمى التاي كولگىنوۆ گاز باللونى جارىلعان ءدامحاناداعى ورتتەن قازا بولعان قىزدىڭ وتباسىنا كوڭىل ايتىپ، كومەك كورسەتىلەتىنىن ءمالىم ەتكەن.