ۇكىمەت وتىرىسىندا پرەمەر-مينيستر اسقار مامين ەلدى مەكەندەردى گازداندىرۋدى بەلسەندى تۇردە جالعاستىرۋ – ۇكىمەتتىڭ باستى مىندەتتەرىنىڭ ءبىرى ەكەنىن ايتتى.

– الەمدىك ەنەرگەتيكا نارىعىن تالداۋ گاز ونەركاسىبى ەنەرگيا تاسىمالداۋشىلاردىڭ وزگە ءتۇرىن ءوندىرۋ مەن تۇتىنۋعا قاراعاندا، قارقىندى دامىپ كەلە جاتقانىن كورسەتىپ وتىر. قازاقستاندا دا وسىنداي جاعداي بايقالىپ وتىر. بيىل تۇتىنۋ 16،5 ملرد تەكشە مەترگە دەيىن وسەدى دەپ كۇتىلىپ وتىر. ەڭ الدىمەن، بۇل تۇتىنۋشىلار سانىنىڭ وسۋىمەن بايلانىستى. بۇل ورايدا ەلەكتر ەنەرگياسىن ءوندىرۋ ءۇشىن گاز – 50 پايىز، كوممۋنالدىق-تۇرمىستىق سەكتور – 36 پايىز، ونەركاسىپ 14 پايىز پايدالاناتىن بولادى. بيىلعى جىلدىڭ قورىتىندىسى بويىنشا ەل تۇرعىندارىن گازداندىرۋ كورسەتكىشى 53 پايىز دەڭگەيىندە جوسپارلانعان. 9،8 ملن ادام تابيعي گازعا قولجەتىمدىلىككە يە بولادى. 2025 جىلى گازداندىرۋ دەڭگەيى 60 پايىزعا جەتىپ، 2120 ەلدى مەكەن نەمەسە 11،7 ملن تۇرعىن قوسىلادى، – دەدى ۇكىمەت باسشىسى.

اسقار مامين ەنەرگەتيكا ءمينيسترى نوعايەۆقا ەلدى مەكەندەردى گازداندىرۋدى بەلسەندى جالعاستىرۋ كەرەگىن ايتتى.

– بۇعان "سارىارقا" جوباسىنىڭ 2-3-كەزەڭدەرىنىڭ ىسكە اسىرىلۋى، شىعىس قازاقستاندى گازداندىرۋ جانە دە وڭىرلىك جەلىلەردى كەڭەيتۋ مەن رەكونسترۋكسيالاۋ ىقپالىن تيگىزەدى. سوندىقتان، نۇرلان اسقار ۇلى، ەلدى مەكەندەردى گازداندىرۋدى بەلسەندى تۇردە جالعاستىرۋ كەرەك. بۇل – ۇكىمەتتىڭ باسىم مىندەتتەرىنىڭ ءبىرى، – دەدى.