بۇگىن ءماجىلىس سپيكەرى نۇرلان ءنىعماتۋليننىڭ توراعالىعىمەن پالاتا بيۋروسى ءوتىپ، وندا الداعى جالپى وتىرىستىڭ كۇن ءتارتىبى ناقتىلاندى.
ءماجىلىس ءبىرىنشى وقىلىمدا جول ءجۇرىسى ماسەلەلەرىنە قاتىستى زاڭ جوباسىن تالقىلايدى.
سونىمەن قاتار ءبىرىنشى وقىلىمدا جەر قويناۋى جانە عىلىم ماسەلەلەرى، سونداي-اق، كاسپيي تەڭىزىندە قىزمەتتى جۇزەگە اسىرۋعا بايلانىستى زاڭ جوبالارى قارالادى.
كۇن ءتارتىبىنىڭ جوباسىندا «نوتاريات تۋرالى» قازاقستان رەسپۋبليكاسىنىڭ زاڭىنا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن قاراۋ ۇسىنىلادى.
الداعى جالپى وتىرىستا دەپۋتاتتار قازاقستان مەن بىرىككەن اراب امىرلىكتەرىنىڭ اراسىنداعى ەكى ەل ەلشىلىكتەرى اراسىنداعى قاجەتتىلىكتەرىنە استانا قالاسىندا جانە ءابۋ دابي قالاسىندا جەر ۋچاسكەلەرىن وتەۋسىز پايدالانۋعا ءوزارا بەرۋ تۋرالى كەلىسىمدى راتيفيكاسيالاۋ تۋرالى زاڭ جوبالارىن قارايدى.
بيۋرو وتىرىسىندا «ماقتا سالاسىن دامىتۋ تۋرالى» قازاقستان رەسپۋبليكاسى زاڭىنىڭ كۇشى جويىلدى دەپ تانۋ جانە قازاقستان رەسپۋبليكاسىنىڭ كەيبىر زاڭنامالىق اكتىلەرىنە وزگەرىستەر ەنگىزۋ تۋرالى» جانە ۆەتەريناريا ماسەلەلەرى بويىنشا زاڭ جوبالارى ەكىنشى وقىلىمدا ۇسىنىلادى.
الداعى جالپى وتىرىستا پالاتا ءبىرقاتار راتيفيكاسيالىق زاڭ جوبالارىن جۇمىسقا الادى. ولار مەملەكەتارالىق ستاندارتتاۋ جونىندەگى قۇجاتتاردى تاراتۋ تۋرالى جانە ەۋرازيالىق ەكونوميكالىق وداق شەڭبەرىندە باعالى مەتالدارمەن جانە اسىل تاستارمەن وپەراسيالاردى جۇزەگە اسىرۋ ەرەكشەلىكتەرى تۋرالى كەلىسىمدەردى راتيفيكاسيالاۋ.
پىكىر قالدىرۋ