ءبىلىم جانە عىلىم مينيسترلىگىندە قازاقستاندىق مۇعالىمدەردىڭ ورتاشا ەسەپپەن قانشا جالاقى الاتىنىن ايتتى، دەپ حابارلادى Tengrinews.kz.

ۆەدومستۆودا حابارلاعانداي، قازاقستاننىڭ ستراتەگيالىق جوسپارلاۋ جانە رەفورمالار جونىندەگى اگەنتتىگىنىڭ ۇلتتىق ستاتيستيكا بيۋروسىنىڭ دەرەكتەرىنە سايكەس، ءبىلىم بەرۋ سالاسىنداعى قىزمەتكەرلەردىڭ ورتاشا ايلىق جالاقىسى 2020 جىلدىڭ II توقسانىندا 184،4 مىڭ تەڭگەنى قۇرايدى. 2019 جىلى بۇل سوما 126،1 مىڭ تەڭگە بولعان.

سونداي-اق مينيسترلىك مۇعالىمدەردىڭ جالاقىسى نەگە بايلانىستى ەكەنىن ايتتى.

ءبىلىم بەرۋ ۇيىمدارى قىزمەتكەرلەرىنىڭ ەڭبەگىنە اقى تولەۋ تومەندەگى ساتىلار بويىنشا انىقتالادى:

♦ ءبىلىم دەڭگەيى،
♦ بىلىكتىلىكتىڭ بولۋى،
♦ جۇمىس ءوتىلى،
♦ ەڭبەك جاعدايلارى،
♦ ورىندالاتىن جۇمىس كولەمى،
♦وتەماقى جانە ىنتالاندىرۋ سيپاتىنداعى ۇستەمەاقىلار مەن قوسىمشا اقىنىڭ بولۋى (عىلىمي-پەداگوگيكالىق باعىت بويىنشا ماگيستر دارەجەسى ءۇشىن، سىنىپ جەتەكشىلىگى ءۇشىن، داپتەرلەر مەن جازبا جۇمىستارىن تەكسەرگەنى ءۇشىن جانە ت.ب. قوسىمشا اقى).

سونىمەن قاتار، ۆەدومستۆودا مەملەكەتتىك ءبىلىم بەرۋ ۇيىمدارى پەداگوگتەرىنىڭ جالاقىسى ۇيىمنىڭ ءبىرىنشى باسشىسى بولەتىن جانە اپتاسىنا نورماتيۆتىك جۇكتەمەنى ەسكەرە وتىرىپ ايقىندالاتىن وقۋ جۇكتەمەسى نەگىزىندە ەسەپتەلەتىنى اتاپ ءوتىلدى.