سەناتتا قاسىم-جومارت توقايەۆتىڭ ق ر جوعارعى سوتىنىڭ سۋديالارى لاۋازىمىنا ۇسىنىمدارى قارالدى. بۇل تۋرالى senate.parlam.kz سايتى حابارلادى.

2 جەلتوقسانداعى وتىرىس قورىتىندىسى بويىنشا جوعارعى سوت سۋدياسى لاۋازىمىنا كانديداتۋرالاردى پالاتانىڭ قاراۋىنا ەنگىزۋ تۋرالى شەشىم قابىلدانعان. بۇگىن سەناتورلار قازاقستان پرەزيدەنتى ۇسىنعان جوعارعى سوتتاعى جاڭا كانديداتۋرالاردى ماقۇلدادى.

وسىلايشا سەنات دەپۋتاتتارى جوعارعى سوتتىڭ ەكى جاڭا سۋدياسىن سايلايدى.

– جوعارعى سوتتىڭ سۋديالارى لاۋازىمىنا اقتوبە وبلىستىق سوتىنىڭ ءتوراعاسى ابدوللا ساكەن جانە استانالىق سوتتىڭ سۋدياسى وماربەكوۆا مادەنيەت جاقان قىزى ۇسىنىلدى. كانديداتتاردىڭ ورتاشا سۋديالىق تاجىريبەسى 22 جىلدان اسادى، ەكەۋى دە جوعارعى سوتتىڭ سۋديالارى رەتىندەگى جاۋاپتى جانە كۇردەلى جۇمىسقا تولىق دايىن.

سونداي-اق، دۇيسەنبايەۆ قاھارمان بازاربەك ۇلى قىزمەتىنەن كەتىپ، ونىڭ ءوتىنىشى قاناعاتتاندىرىلدى، – دەدى جوعارعى سوت كەڭەسىنىڭ ءتوراعاسى تالعات دوناقوۆ سەناتتىڭ جالپى وتىرىسىندا.

ابدوللا ساكەن – 1964 جىلى تۋعان، زاڭگەرلىك ءبىلىمى بار. زاڭ عىلىمدارىنىڭ كانديداتى.

وماربەكوۆا مادەنيەت جاقان قىزى – 1965 جىلى تۋعان، جوعارى زاڭ ءبىلىمى. زاڭ عىلىمدارىنىڭ كانديداتى.