بايقوڭىر قالاسىنىڭ رەسەي فەدەراسياسىنا جالعا بەرىلگەن اۋماقتارىندا 1،9 ملن توننا زاڭسىز قۇرىلىس قالدىقتارى جاتىر. بۇل تۋرالى ءماجىلىس دەپۋتاتتارىنىڭ ساۋالىنا وراي پرەمەر-مينيستر اسقار ءماميننىڭ جاۋابىندا ايتىلعان.

– "بايقوڭىر" كەشەنىنىڭ 5 الاڭىندا (№9، 9گ، 9تزب، 15گ جانە 20) رۇقسات ەتىلمەگەن ورىنداردا ورنالاسقان قۇرىلىس جانە باسقا دا قالدىقتار رەسەي فەدەراسياسىنا جالعا بەرىلگەن جەر ۋچاسكەلەرىندە ورنالاسقان. 2018 جىلى مۇددەلى مەملەكەتتىك ورگاندار قاتارىنان (ق ر ەگترم، بايقوڭىر قالاسىنىڭ اكىمشىلىگى، رەسەي فەدەرالدى بيومەديسينالىق اگەنتتىگى) كوميسسيا قۇرىلدى، رۇقسات ەتىلمەگەن قوقىس ورىندارى مەن جەر ۋچاسكەلەرىن ورنالاستىرۋ سحەماسى جاسالدى. تۇزىلەتىن قالدىقتاردىڭ ورىندارى، كولەمى جانە ولاردىڭ مورفولوگيالىق قۇرامى انىقتالدى، – دەدى پرەمەر-مينيستر.

ونىڭ ايتۋىنشا، جوعارىدا اتالعان كوميسسيانىڭ جۇمىسىن تۇگەندەۋ اكتىسىنە سايكەس بايقوڭىر قالاسىنىڭ اۋماعىندا رۇقسات ەتىلمەگەن جەرلەردە ورنالاسقان قيراعان عيماراتتار مەن قۇرىلىستاردىڭ جانە باسقا دا قالدىقتاردىڭ جالپى كولەمى 1،9 ملن توننانى قۇرايدى.

– ەكولوگيا، گەولوگيا جانە تابيعي رەسۋرستار مينيسترلىگى بايقوڭىر قالاسى اكىمشىلىگىنىڭ باسشىسىنا قالا اۋماعىن قازاقستان رەسپۋبليكاسىنىڭ ەكولوگيالىق زاڭناماسىنىڭ تالاپتارىنا سايكەس كەلتىرۋ جونىندە تۇبەگەيلى شارالار قابىلداۋ تۋرالى حات جولدادى. قازىرگى ۋاقىتتا ەكولوگيا، گەولوگيا جانە تابيعي رەسۋرستار مينيسترلىگى قىزىلوردا وبلىسىنىڭ اكىمدىگىمەن بىرلەسىپ، رەسەي تاراپىمەن وسى ماسەلەنى پىسىقتاۋدى جالعاستىرۋدا، – دەدى اسقار مامين.