الەۋمەتتىك جەلىدە "تۇركىستان وبلىسىندا تۇسىرىلگەن" دەلىنگەن پوليسيانىڭ ۇستاۋ وپرەاسياسى مەن قارۋ اتىلعانى كورسەتىلگەن ۆيدەو تاراپ جاتىر. ۆيدەوداعى ماتىندىك حابارلامادا وقيعا سالدارىنان ەكى پوليسيا قىزمەتكەرى قازا تاپقانى ايتىلعان. StopFake سايتى بۇل اقپاراتتىڭ جالعان ەكەنىن ايتتى.
"شىن مانىندە، روليكتىڭ قازاقستانعا ەش قاتىسى جوق. ول رەسەيدە تۇسىرىلگەن. ۆيدەو Youtube-تا بىرنەشە جىل بۇرىن جاريالانعان" دەلىنگەن سايت جازباسىندا.
– بۇل اقپارات جالعان ەكەنىن جانە وقيعانىڭ 2014 جىلى رەسەي اۋماعىندا بولعانىن حابارلايمىز. سونىمەن قاتار ازاماتتاردان جالعان اقپاراتتى ودان ءارى تاراتپاۋدى سۇرايمىز جانە مەملەكەتتىك ورگانداردىڭ رەسمي دەرەكتەرىنە عانا سەنۋگە شاقىرامىز. ەستەرىڭىزگە سالا كەتەيىك، جالعان اقپارات تاراتۋ قازاقستان رەسپۋبليكاسىنىڭ زاڭناماسىنا سايكەس قىلمىستىق جاۋاپكەرشىلىككە اكەپ سوعادى، – دەلىنگەن تۇركىستان وبلىسى پوليسيا دەپارتامەنتىنىڭ رەسمي حابارلاماسىندا.
ۆەدومستۆونىڭ حابارلاۋىنشا، جالعان اقپاراتتىڭ تارالۋىنا جول بەرمەۋ ماقساتىندا الەۋمەتتىك جەلىلەردەگى جاريالانىمدارعا كۇندەلىكتى باقىلاۋ جۇرگىزىلەدى.
پىكىر قالدىرۋ