قىزىلوردا وبلىسىنىڭ بۇرىنعى اكىمى قۋانىشبەك ىسقاقوۆقا قاتىستى سوت ۇكىم شىعاردى. شەشىمگە سايكەس ەكس-اكىم تۇرمە جازاسىن وتەۋگە ءتيىس، دەپ حابارلادى Tengrinews.kz. سايتى.

قۋانىشبەك ىسقاقوۆتىڭ ۇكىمى № 2 قىزىلوردا قالالىق سوتىندا جاريا ەتىلدى. سوت ىسقاقوۆتى جەتى جىلعا باس بوستاندىعىنان ايىردى. ول جازاسىن ورتاشا قاۋىپسىزدىك كولونياسىندا وتەۋى كەرەك. سونىمەن قاتار قىزىلوردا وبلىسىنىڭ ەكس-اكىمىن مەملەكەتتىك، ۇلتتىق جانە كۆازيمەملەكەتتىك ۇيىمداردا قىزمەت اتقارۋ قۇقىعىنان ايىردى.

بۇعان دەيىن پروكۋرور قىزىلوردا وبلىسىنىڭ بۇرىنعى اكىمىن سەگىز جىلعا باس بوستاندىعىنان ايىرۋدى سۇراعان بولاتىن. مەملەكەتتىك ايىپتاۋشى ىسقاقوۆتى "اسا ءىرى كولەمدەگى الاياقتىق" ءۇشىن كىنالى دەپ تانۋدى سۇرادى.

قىزىلوردا وبلىسىنىڭ اكىمى بولىپ تۇرعان كەزدە قاماۋعا الىنعان قۋانىشبەك ىسقاقوۆ 2020 جىلدىڭ ناۋرىز ايىنىڭ سوڭىنان باستاپ ءۇيقاماقتا بولعان. وعان قىلمىستىق كودەكستىڭ 190-بابى 4-بولىگىنىڭ 2-تارماعى (اسا ءىرى مولشەردە الاياقتىق) بويىنشا ايىپ تاعىلدى. سول باپ بويىنشا ونىمەن بىرگە تاعى ءتورت ادام ءىس بويىنشا ءوتتى. ءىستىڭ فيگۋرانتتارى قىزىلوردا وبلىسى اكىمىنىڭ بۇرىنعى ورىنباسارى مۇرات يماندوسوۆ جانە اكىمنىڭ تاعى ەكس-ورىنباسارى مارات دەلمۇحانوۆ بولدى. سونىمەن قاتار، ايىپتاۋ اكتىسىنىڭ كوشىرمەسى بيزنەسمەندەر جەڭىسبەك ىسقاقوۆقا، ازات دوسمايىلوۆقا تابىس ەتىلدى.