الماتى وبلىسىندا بەس بالانىڭ اناسىنىڭ ولىمىنە قاتىسى بار دارىگەرلەرگە سوت ۇكىمى شىقتى. بۇل تۋرالى polisia.kz سايتى حابارلادى.
2018 جىلدىڭ قازان ايىندا 35 جاستاعى بەس بالانىڭ اناسى بوسانعاننان كەيىن قايتىس بولعان. وقيعا ۇيعىر اۋدانى شونجى اۋىلىنىڭ ورتالىق اۋرۋحاناسى پەرزەنتحاناسىندا بولدى.
بۇل وقيعاعا بايلانىستى قىلمىستىق كودەكستىڭ 317-بابىنىڭ 3-بولىگى ("مەديسينا نەمەسە فارماسيەۆتيكا قىزمەتكەرىنىڭ ولارعا ۇقىپسىز قاراۋى نەمەسە ادال قاراماۋى سالدارىنان كاسىبي مىندەتتەرىن ورىنداماۋى، تيىسىنشە ورىنداماۋى، ەگەر بۇل ارەكەتتەر ابايسىزدا ادام ولىمىنە الىپ كەلسە") بويىنشا قىلمىستىق ءىس تىركەلدى.
سوت ۇكىمىنە سايكەس 63 جاستاعى دارىگەر-حيرۋرگ ەكى جىلعا باس بوستاندىعىنان ايىرىلدى. وعان كومەك كورسەتكەن 33 جاستاعى اكۋشەر-گينەكولوگقا ۇكىمنىڭ ورىندالۋىن بەس جىلعا كەيىنگە قالدىرا وتىرىپ، 1 جىل 6 اي مەرزىمگە باس بوستاندىعىنان ايىرۋ جازاسى تاعايىندالدى. ال 31 جاستاعى اكۋشەر-گينەكولوگقا جازاسىن وتەۋدىڭ بارلىق مەرزىمىنە پروباسيالىق باقىلاۋ بەلگىلەنە وتىرىپ، شارتتى تۇردە 1 جىل 6 اي مەرزىمگە باس بوستاندىعىنان ايىرۋ جازاسى تاعايىندالدى. سونداي-اق بارلىق ءۇش دارىگەر ءبىر جىل مەرزىمگە دارىگەر بولۋ قۇقىعىنان ايىرىلدى. جابىرلەنۋشىنىڭ مۇددەسى ءۇشىن ولاردان 5 ميلليون تەڭگە كولەمىندە مورالدىق شىعىن ءوندىرىلدى.
پىكىر قالدىرۋ