ۋكراينا پرەزيدەنتى ۆلاديمير زەلەنسكيي The New York Times گازەتىنە بەرگەن سۇحباتتا امەريكاداعى سايلاۋدا جەڭىمپاز اتانعان دجو بايدەننىڭ پرەزيدەنتتىگىنەن قانداي ءۇمىت كۇتەتىنى تۋرالى ايتىپ بەردى.
زەلەنسكيي اقش-تىڭ سايلانعان پرەزيدەنتىنىڭ كييەۆپەن "تىعىز بايلانىسىن" جانە ونىڭ ۋكراين مەنتاليتەتىنىڭ ەرەكشەلىكتەرىن تۇسىنەتىنىن اتاپ ءوتتى.
– بۇل شىنىمەن قارىم-قاتىناستى نىعايتۋعا، دونباستاعى سوعىستى شەشۋگە جانە ءبىزدىڭ اۋماقتى جاۋلاپ الۋدى توقتاتۋعا كومەكتەسەدى. امەريكا قۇراما شتاتتارى كومەكتەسە الادى، – دەدى ۋكراينا پرەزيدەنتى.
زەلەنسكيي امەريكانىڭ قازىرگى تاڭداعى پرەزيدەنتى دونالد ترامپتىڭ اكىمشىلىگىنە قولداۋ كورسەتكەنى ءۇشىن، ونىڭ ىشىندە رەسەيگە قارسى سانكسيالاردى قاتاڭداتقانى ءۇشىن ريزاشىلىعىن ءبىلدىردى. سونىمەن بىرگە ول امەريكالىق بيلىك كوپ نارسەنى ىستەي الاتىنىن اتاپ ءوتتى. مىسالى، دونباستاعى "قاقتىعىسقا جاقىن ۇكىمەت باسقاراتىن اۋداندارعا" ينۆەستيسيالاردى بەلسەندى تۇردە ىنتالاندىرۋ.
ۋكراينا پرەزيدەنتى اقش-تى قىرىمدى "قايتارۋ" ماسەلەسىندە كومەكتەسۋگە شاقىردى.
– ءقازىر ءبىز "قىرىم پلاتفورماسىن" قۇرىپ جاتىرمىز، ارينە، وندا قىرىمدى قايتارۋدىڭ نەگىزگى ويىنشىلارى سانالاتىن ەلدەردى كورگىمىز كەلەدى. اقش بۇل باعىتتا كوشباسشى بولا الار ەدى، – دەپ تولىقتىردى زەلەنسكيي.
دونباستاعى جاعداي اياسىندا ماسكەۋ مەن كييەۆ اراسىنداعى قارىم-قاتىناس ناشارلاعان. ۋكراينا بيلىگى بۇعان دەيىن ماسكەۋدى ەلدىڭ ىشكى ىستەرىنە ارالاسقانى ءۇشىن بىرنەشە رەت ايىپتاعان. 2015 جىلدىڭ قاڭتارىندا ۋكراينانىڭ جوعارعى راداسى رەسەي "اگرەسسور ەل" دەپ مالىمدەمە جاساعان.
پىكىر قالدىرۋ