قازاقستاندا 2020 جىلدىڭ 25 جەلتوقساننان باستاپ 2021 جىلدىڭ 5 قاڭتارىنا دەيىن شەكتەۋ شارالارى كۇشەيتىلەدى. بۇل تۋرالى پرەمەر-مينيستردىڭ رەسمي سايتى حابارلادى.
"قازاقستاندا كوروناۆيرۋس ينفەكسياسىنىڭ تارالۋى باقىلاناتىن دەڭگەيدە تۇر. كوروناۆيرۋس ينفەكسياسىمەن جاڭادان سىرقاتتانعانداردىڭ تاۋلىكتىك ءوسىمى 0،4%-دى، رەپرودۋكتيۆتىك كورسەتكىشى 0،9-دى قۇرايدى. ينفەكسيالىق توسەك ورىندارىنىڭ تولىمدىلىعى – 28%، رەانيماسيالىق توسەك ورىندارىنىڭ تولىمدىلىعى – 20%. 5 ءوڭىر جوعارى جانە ورتاشا تاۋەكەل ايماقتارىندا ورنالاسقان، اتاپ ايتساق: اتىراۋ، قوستاناي، پاۆلودار، سولتۇستىك قازاقستان جانە اقمولا وبلىستارى" دەلىنگەن حابارلامادا.
كەلەسى جىلعى قاڭتار-اقپان ايلارىندا جرۆي مەن تۇماۋدىڭ ءوسۋى اياسىندا كوروناۆيرۋس ينفەكسياسىمەن سىرقاتتانۋ دەڭگەيىنىڭ ارتۋ ءقاۋپى بار.
وسىعان بايلانىستى ۆاك ءبىرقاتار شەشىم قابىلدادى:
- 2020 جىلعى 25 جەلتوقساننان باستاپ 2021 جىلعى 5 قاڭتارعا دەيىن ويىن-ساۋىق، سپورتتىق جانە باسقا دا بۇقارالىق ءىس-شارالاردى، ونىڭ ىشىندە جاڭا جىلدىق ەرتەڭگىلىكتەر مەن مەرەكەلىك كورپوراتيۆتەردى وتكىزۋگە تىيىم سالىنادى.
- ەپيدەميولوگيالىق جاعداي تۇراقتالعانعا دەيىن "تەڭىز" كەن ورنىندا شەكتەۋ شارالارى كۇشەيتىلەدى.
- بولشەك ساۋدا جەلىسىندە انتيكوۆيدتى دارىلىك زاتتاردىڭ باعاسىن ورتا ەسەپپەن 24%-عا تومەندەتۋ بويىنشا شارالار قابىلداۋ.
سونىمەن قاتار ءبىلىم بەرۋ ساپاسىن قامتاماسىز ەتۋ ماقساتىندا، ءبىلىم جانە عىلىم مينيسترلىگىنىڭ ۇسىنىسى بويىنشا، سونداي-اق قوعامنىڭ پىكىرىن ەسكەرە وتىرىپ، كەلەسى شەشىمدەر قابىلداندى:
- وقۋ جىلىنىڭ III توقسانىنان باستاپ ءبىتىرۋشى سىنىپتار ءۇشىن (9،11،12 سىنىپتار) سانيتارلىق-ەپيدەميولوگيالىق تالاپتاردى ساقتاي وتىرىپ، ارالاس وقىتۋ (پاندەردىڭ 70%-ىن – ءداستۇرلى فورماتتا، 30%-ىن – قاشىقتان) قاراستىرىلسىن؛
- وقۋ جىلىنىڭ III توقسانىنان باستاپ مەكتەپ وقۋشىلارىنىڭ بىلىمىندەگى ولقىلىقتاردىڭ ورنىن تولتىرۋ ماقساتىندا ساباقتان تىس ۋاقىتتا 5 ادامنان اسپايتىن توپتاردا جەكە كونسۋلتاسيا ۇيىمداستىرىلسىن؛
- II سەمەستردەن باستاپ كوللەدجدەر مەن جوعارى وقۋ ورىندارىنىڭ ءبىرىنشى كۋرس ستۋدەنتتەرىن ارالاس وقىتۋ قايتا باستالسىن.
ۇكىمەت باسشىسى اكىمدەرگە وڭىردەگى ەپيدەميولوگيالىق جاعدايعا بايلانىستى جاعدايدى تۇراقتاندىرۋ ماقساتىندا قاجەتتى شەكتەۋ شارالارىن قابىلداۋدى تاپسىردى.
