پرەزيدەنت قاسىم-جومارت توقايەۆ پرەمەر-مينيستر اسقار ءماميندى قابىلدادى. پرەمەر-مينيستر مەملەكەت باسشىسىنا ەلدەگى سانيتارلىق-ەپيدەميولوگيالىق احۋال مەن الەۋمەتتىك-ەكونوميكالىق دامۋدىڭ وزەكتى ماسەلەلەرى جايىندا ەسەپ بەردى.

ۇكىمەت باسشىسى رەسپۋبليكاداعى سانيتارلىق-ەپيدەميولوگيالىق احۋال باقىلاۋدا ەكەنىن، كۇندەلىكتى جاڭادان ىندەتكە شالدىققانداردىڭ سانى 0،4 پايىزعا ءوسىپ وتىرعانىن، ەل بويىنشا كوروناۆيرۋستىڭ ءورشۋ دەڭگەيىنىڭ كورسەتكىشى 0،9 پايىزدى قۇرايتىنىن ايتتى.

ونىڭ ايتۋىنشا، جۇقپالى اۋرۋلار اۋرۋحانالارىنىڭ 28 پايىزىندا، جانساقتاۋ بولىمدەرىنىڭ 20 پايىزىندا ادامدار ەمدەلىپ جاتىر.

قازىرگى ۋاقىتتا COVID-19 ىندەتىنىڭ تارالۋ قارقىنى بويىنشا اتىراۋ وبلىسى "قىزىل" ايماقتا، قوستاناي، اقمولا، پاۆلودار جانە سولتۇستىك قازاقستان وبلىستارى "سارى" ايماقتا، قالعان وڭىرلەردىڭ بارلىعى "جاسىل" ايماقتا تۇر.

مامين 19 جەلتوقساندا وتاندىق QazCovid-in ۆاكسيناسىن كلينيكالىق سىناقتان وتكىزۋدىڭ سوڭعى ءىىى ساتىسى باستالاتىنىن ەسكەرتتى. ول 3 مىڭ ەرىكتى ازاماتقا ەكپە ەگىلۋدە ەكەنىن ايتتى.

– 2021 جىلى ناۋرىز ايىندا جامبىل وبلىسى قورداي اۋدانىندا جىلىنا قۋاتى 60 ميلليون مولشەردە ۆاكسينا شىعارۋعا جەتەتىن بيوفارماسيەۆتيكالىق زاۋىت پايدالانۋعا بەرىلەدى. سونىمەن بىرگە قاراعاندى قالاسىندا رەسەيلىك "سپۋتنيك V" ۆاكسيناسىن شىعارۋ ءوندىرىسىن ىسكە قوسۋعا دايىندىق جۇمىستارى ءجۇرىپ جاتىر، – دەپ اتاپ ءوتتى ۇكىمەت باسشىسى.