شىمكەنتتە ايەلدى زورلاماق بولعان ەر ادام ۇستالدى. بۇل تۋرالى ىشكى ىستەر مينيسترلىگىنىڭ رەسمي وكىلى ءنۇردىلدا وراز مالىمدەدى.

– شىمكەنت پوليسەيلەرى قالاداعى كوپپاتەرلى ۇيلەردىڭ ءبىرىنىڭ كىرەبەرىسىندە ايەلدى زورلاماقشى بولعان كۇدىكتىنى كەشە ۇستادى. ول 1985 جىلى تۋعان جەرگىلىكتى تۇرعىن بولىپ شىقتى. تەرگەۋ امالدارى ناتيجەسىندە كۇدىكتى ايەلدىڭ كۇرتەشەسىنەن 8 مىڭ تەڭگەگە جۋىق اقشانى ۇرلاعانى انىقتالدى. ەر ادام ءوز كىناسىن تولىعىمەن مويىندادى. قازىرگى كەزدە كۇدىكتى شىمكەنت قالاسى پوليسيا دەپارتامەنتىنىڭ ۋاقىتشا ۇستاۋ اباقتىسىنا قامالدى.

ىشكى ىستەر مينيسترلىگىنىڭ رەسمي وكىلى اتالعان ءىس قىلمىستىق كودەكستىڭ 191-بابى 2-بولىگى جانە 120-بابى 1-بولىگى (توناۋ جانە زورلاۋعا وقتالۋ) نەگىزدەرى بويىنشا سوتقا دەيىنگى تەرگەۋدىڭ باستالعانىن حابارلادى.

ونىڭ ايتۋىنشا، كۇدىكتىنىڭ قىلمىسى دالەلدەنسە، 8 جىلعا دەيىن باس بوستاندىعىنان ايىرىلۋى مۇمكىن.

ەسكە سالا كەتەيىك، 17 جەلتوقساندا ەڭبەكشى اۋداندىق پوليسيا ءبولىمىنىڭ كەزەكشى بولىمشەسىنە ايەلدى زورلاماق بولعان ەر ادامنىڭ ۇستىنەن شاعىم تۇسكەن.