تۇرمىستىق زورلىق-زومبىلىقتاردىڭ نەگىزى الەۋمەتتىك پروبلەمادا جاتىر. بۇل تۋرالى ADAL پارتياسىنىڭ مۇشەسى، جۋرناليست ماقسات تولىقباي "Qazaqstan" تەلەارناسىندا وتكەن تەلەدەباتتا ايتتى.

– پاندەميا كەزىندە تۇرمىستىق زورلىق-زومبىلىق وتە كوبەيدى. ىشكى ىستەر مينيسترلىگىنىڭ دەرەگىنە سۇيەنسەك، بىزدەگى قىلمىستىڭ 78 پايىزى جۇمىسسىزدىقتان بولادى. تاعى الەۋمەتتىك پروبلەماعا كەلىپ تىرەلەمىز. جۇمىس ورىندارىن كوبەيتۋىمىز كەرەك. بىزگە ءوندىرىس كەرەك. شيكىزاتتان ارىلۋ كەرەك.

ايەلدەرگە ەركەكتەردىڭ قول كوتەرۋىنىڭ سەبەبى، پسيحولوگتاردىڭ ايتۋىنشا، ىشىمدىككە سالىنۋدان بولادى. ادام ىشىمدىككە نەگە سالىنادى؟ تاعى سول الەۋمەتتىك پروبلەما، – دەدى تولىقباي.

سونداي-اق ول پوليسيا پارا الماۋ ءۇشىن ولاردىڭ جالاقىسىن كوتەرۋ كەرەك ەكەنىن اتاپ ايتتى.

–  ەكىنشى ماسەلە – زاڭنىڭ ءادىل سويلەمەيتىندىگىندە. قانشاما جىل جۋرناليستيكا سالاسىندا كەلە جاتىرمىن عوي. بىزدە پروكۋراتۋرادان، سوتتان، تەرگەۋشىلەردەن ادىلدىك كورمەگەن ادامدار ەڭ سوڭعى كەلەتىنى جۋرناليستەر بولىپ قالدى. 

ىشكى ىستەر ورگاندارىنىڭ ءوزى – بىزدە ەڭ جەمقور سالانىڭ ءبىرى. حالىق پوليسيادان شوشيدى، كەرىسىنشە ول سەنىڭ قورعاۋشىڭ بولۋىڭ كەرەك قوي. سوندىقتان ءبىرىنشى كەزەكتە وسى سالاعا بىلىكتى ماماندار كەلۋ ءۇشىن، قىلمىس اشىلۋ ءۇشىن، پوليسيا پارا الماۋ ءۇشىن ولاردىڭ دا جالاقىسىن كوبەيتۋىمىز كەرەك. قانشا يدەيا ايتساق تا، جەمقورلىقتى جويماي ەشتەڭە جۇزەگە اسپايدى. باستى ماسەلە جەمقورلىقتا بولىپ تۇر.

ءبىزدىڭ ADAL پارتياسى ءبىزدى مينيسترلىكتەر 30 جىلدا جاساي الماعان كەرەمەت پلاتفورما ۇسىنادى. ول جەردە جەمقورلىققا، قىلمىسقا قاتىستى ارىز جازا الادى. سول ارىز بەس سەكۋندتا وڭىردەگى كانديداتتىڭ جەكە كابينەتىنە كەلىپ تۇسەدى، – دەدى ول.