نۇر-سۇلتان قالاسىنىڭ ەلميرا ەسىمدى تۇرعىنى بۇرىنعى كۇيەۋىنىڭ ونى سوققىعا جىققانىن ايتىپ، ەلدەن كومەك سۇرادى. اقپارات "نەمولچي.كز" قوزعالىسىنىڭ Instagram پاراقشاسىندا جاريالاندى.

– مەنىڭ بۇرىنعى كۇيەۋىم ءسىڭىلىم ەكەۋمىزدى ۇردى كەتتى. بۇل 2020 جىلدىڭ 20 جەلتوقسانىندا بولدى. مەن ۇيدە ەمەس ەدىم، ءسىڭلىم حابارلاسىپ، بۇرىنعى كۇيەۋىمنىڭ كەلىپ، پودەزدە شۋ شىعارىپ تۇرعانىن ايتتى. كورشىلەردىڭ مازاسىن الماۋ ءۇشىن ول ەسىكتى اشقان. مەن ۇيگە كەشكى ساعات 20:10-دا كەلدىم، ول ۇيىقتاپ جاتىر ەكەن. ءسىڭلىم مەن بالالارىم ونىڭ ماس ەكەنىن ايتىپ، قولىنداعى شولمەگىن كورسەتتى. مەن ونى وياتىپ، دالاعا شىعارىپ جىبەرمەك بولدىم، انام كەلە جاتىر دەپ الدادىم. ءبىراق ەسىكتى جاۋىپ ۇلگەرمەدىم، ول مەنىڭ قولىمنان تارتىپ، پودەزگە شىعارعىسى كەلدى. ءسىڭلىم اراشا ءتۇسىپ ەدى، ونى بالاعاتتاپ، سوققىنىڭ استىنا الدى. ارتىنشا مەنى ۇرىپ، كەيىن تەپكىلەپ تاستادى. بىرنەشە سەكۋندقا ەسىمدى جوعالتىپ الدىم. ەسىمدى جيسام بالالارىم جىلاپ جاتىر، بۇرىنعى كۇيەۋىم اس ۇيدە ءسىڭلىمدى ۇرىپ جاتىر ەكەن. قولىندا پىشاعى بولدى. بالالار شوشىنىپ، قاتتى جىلاعاندا ەسىن جيىپ، ۇيدەن قاشىپ كەتتى، – دەيدى ەلوردالىق ەلميرا.

ەلميرا ءوزىن سوققىعا جىقتى دەگەن كۇيەۋىمەن 11 جىل بىرگە تۇرعان، ولاردىڭ 2 ۇل جانە 1 قىزى بار. 

– ءبىز مەديسينالىق كومەككە جانە پوليسياعا جۇگىندىك. پوليسيا ونىمەن تۇسىندىرمە اڭگىمە جۇرگىزدى. وسى جاعدايلارعا بايلانىستى ماعان كومەكتەسۋىڭىزدى سۇرايمىن! ءبىزدىڭ زاڭ ايەلدەردى تۇرمىستىق زومبىلىقتان قۇتقارۋعا دارمەنسىز. بالالار مەكتەپكە بارۋعا، ءتىپتى اۋلاعا شىعۋعا قورقادى. 2019 جىلدىڭ قازان ايىندا مەنىڭ ەكس-جولداسىم باسقا ايەلگە كەتىپ قالعان. ول ەكەۋىن بالالارىم كورىپ قويعان. سودان كەيىن مەن بالالارمەن بىرگە پسيحولوگقا جۇگىنىپ، كومەك الدىق. ءبىز رەسمي تۇردە اجىراسقانبىز. ءبىراق ول ءبىزدى اڭدىپ، ۇرىپ-سوعۋىن توقتاتپادى، – دەيدى ول.