2020 جىلى مەملەكەت باسشىسىنىڭ قاۋلىسىمەن ەرىكتىلەر جىلى دەپ جاريالانعان ەدى.
ءار سالاداعى جاۋاپتى قىزمەتكەرلەر ەرىكتىلەر جىلىن ءوز دەڭگەيىندە وتكىزۋدى ماقسات ەتتى.
بيىل قازاقستان حالقى ءۇشىن عانا ەمەس، تۇتاس الەم جۇرتشىلىعى ءۇشىن اۋىر جىل بولدى. جىل باسىنان بەرى تۇتاس دۇنيەنى اياعىنان تىك تۇرعىزعان كوروناۆيرۋس پاندەمياسى ءبىراز ادامدى ابىگەرگە سالدى.
تۇركىستان وبلىسىندا بىرنەشە اۋىلدى سۋ باسىپ، حالىق شىعىنعا ۇشىرادى. وسىنداي ساتتە ەرىكتى اتانىپ، ارتىنان ءوزىنىڭ قالاۋىمەن اسكەرگە كەتكەن سارباز دارحان ناشىربەكتىڭ وقيعاسى «شەشىمى بار» باعدارلاماسىنىڭ ۇجىمىن بەيجاي قالدىرماعان.
«شەشىمى بار» باعدارلاماسىنىڭ شاقىرۋىمەن 6 اي ۇلىن كورمەگەن گۇلنازيرا مۇراتوۆا الماتىعا تۇركىستان وبلىسى، ماقتارال اۋدانىنان كەلدى. ستۋديادا گۇلنازيرا مۇراتوۆا بالاسىنىڭ اسكەرگە نە سەبەپتى ءوزى سۇرانىپ بارعانىن ايتىپ بەردى. ونىڭ سوزىنشە، وزبەكستانداعى ساردوبا سۋ قويماسى جارىلعان كەزدە تۇركىستان وبلىسىنىڭ بىرنەشە اۋىلىن سۋ باسادى. توتەنشە جاعداي كەزىندە ەرجەتكەن بالاسى كورشى اۋىلدى سۋ قاۋىپىنەن امان الىپ قالۋى ءۇشىن بوگەت جاساپ، اۋىل تۇرعىندارىنا كومەكتەسەدى. العاشقى كومەكتى ق ر ۇلتتىق ۇلان ساربازدارى كورسەتكەندىكتەن، ۇلى دارحان ناشىربەك ۇلاندىقتاردىڭ قاتارىندا بولۋعا شەشىم قابىلداپ، اسكەرگە ءوزى سۇرانىپ بارادى. اكەسى دە قارسى بولماي، بالاسىنىڭ بۇل ويىن قۇپتايدى.
«بالاسى ەلىنە قىزمەت ەتسە، اتا-انا ءۇشىن ودان ارتىق قۋانىش جوق. ەلىن-جەرىن قورعاسىن، ءار ازماتتىڭ بورىشى» دەگەن گۇلنازيرا مۇراتوۆا تەلەارنا ۇجىمىنا العىسىن ايتىپ، شىعارماشىلىق تابىس تىلەدى.
قازىرگى ۋاقىتتا ق ر ۇلتتىق ۇلانى «وڭتۇستىك» وڭىرلىك قولباسشىلىعىنىڭ №5571 اسكەري ءبولىمىنىڭ ساربازى د. ناشىربەك اسكەردە اتا-اناسىنىڭ، جاقىندارىنىڭ ءقادىرىن تۇسىنگەنىن ايتادى: «مەنەن كەيىنگى باۋىرلارىما ايتار اقىلىم – اسكەرگە ءار جىگىت بارۋى ءتيىس، ونى ءاربىر ازامات كورۋى قاجەت. سەبەبى، ول – وتان الدىنداعى ەر-ازاماتتىڭ ەڭ ءبىرىنشى بورىشى. اسكەردە كوپ زاتتىڭ ءقادىرىن تۇسىنەسىڭ. ەڭ ءبىرىنشى، اتا-انانىڭ ءقادىرىن بىلەسىڭ. مىنەزىڭ دە وزگەرىپ، سالماقتى بولا تۇسەسىڭ».
كەلەر جىلى مامىر ايىندا اسكەري بورىشىن اياقتايتىن سارباز الداعى جوسپارىن دا ايتتى. ول زاڭگەر ماماندىعىن وقىپ، سول سالادا ەلىنە قىزمەت ەتپەك ويى بار.
پىكىر قالدىرۋ