تمد حالىقارالىق بايقاۋشىلارى ەلوردانىڭ بىرنەشە سايلاۋ ۋچاسكەسىنىڭ دايىندىعىن پىسىقتادى. تمد-داعى ميسسيا شتابىنىڭ جەتەكشىسى ەۆگەنييي كوزياكتىڭ ايتۋىنشا، ولار ءوز ميسسياسىنا 21 جەلتوقساندا كىرىسكەن.

– وسى كۇننەن بەرى قازاقستاندامىز. شتابىمىز نۇر-سۇلتان قالاسىندا ورنالاسقان. الايدا ءبىز تەك ەلوردانىڭ سايلاۋ ۋچاسكەلەرىنىڭ جۇمىسىن عانا ەمەس، وڭىرلەردىڭ دە دايىندىعىن پىسىقتايتىن بولامىز. مەن ءوزىم الماتى قالاسى مەن الماتى وبلىسىنا بارىپ، سايلاۋعا دايىندىق پروسەسىن كورىپ قايتتىم، – دەيدى ول.

بۇگىن بايقاۋشىلار ەلورداداعى ەكى سايلاۋ ۋچاسكەسىنىڭ جۇمىسىمەن تانىستى. ەكى ۋچاسكە دە داۋىس بەرۋشىلەردى قابىلداۋعا دايىن ەكەنى انىقتالدى.  

– داۋىس بەرۋگە قاجەتتى قۇرال-جابدىقتاردىڭ بارلىعى ورنالاستىرىلعانىنا كۋا بولدىق. سايلاۋشىلارعا قاجەتتى جاعداي جاسالعان. بايقاعانىمىزداي، ەڭ باستى نازار سانيتارلىق شارالارعا اۋدارىلىپتى. داۋىس بەرۋگە ارنالعان كابينالار پەردەسىز ەتىپ جاسالعان. ول دەزينفەكسيا جاساۋعا قولايلى. دەگەنمەن ول داۋىس بەرۋدىڭ قۇپيالىلىعىنا كەدەرگى كەلتىرمەيدى دەپ ويلايمىز. ويتكەنى داۋىس بەرۋشى بيۋللەتەندى تولتىرعاندا وزگەلەرگە ارقاسىمەن تۇرادى. ءقازىر ادامداردىڭ دەنساۋلىعى ماڭىزدى، – دەيدى ەۆگەنيي كوزياك. 

ونىڭ ايتۋىنشا، مۇنداي ءادىس وزگە تمد ەلدەرىندە دە قولدانىلعان. مىسالى مولداۆادا بولعان سايلاۋدا دا كابينا وسىلاي جابدىقتالعان. 

– جۇمىس باستالعالى بارلىق ساياسي پارتيانىڭ سايلاۋالدى شتابىنىڭ وكىلدەرىمەن كەزدەستىك. ولاردان ناۋقاندى ۇيىمداستىرۋ بارىسى تۋرالى ويلارى مەن ۇسىنىستارىن تىڭدادىق. ازىرگە شاعىمدار ەستىمەدىك. سونداي-اق ورتالىق سايلاۋ كوميسسياسىنىڭ مۇشەلەرىمەن دە كەزدەستىك. ەلدىڭ ايماقتارىن دا ارالاپ ءجۇرمىز. وسىلايشا دايىندىق تۋرالى تولىققاندى اسەر الۋعا تىرىسۋدامىز، – دەدى ول. 

ونىڭ ايتۋىنشا، ديپلوماتيالىق كورپۋس وكىلدەرى، قازاقستانداعى تمد ەلشىلىكتەرىنەن بايقاۋشى رەتىندە 20 ادام ۇزاق مەرزىمدى بايقاۋشى رەتىندە تارتىلعان. سايلاۋ كۇنىنە جاقىن قىسقا مەرزىمدى بايقاۋشىلاردىڭ توبى كەلەدى. قازىرگى كۇنى ولاردىڭ 200-دەن استامى ورتالىق سايلاۋ كوميسسياسىندا اككرەديتاسيادان ءوتتى. 

– سايلاۋ اياقتالعان سوڭ ءبىز بايقاۋشىلاردان اقپارات الامىز، سونىڭ نەگىزىندە قورىتىندى جوبا جاسالادى. ول ميسسيامىزدىڭ باسپا ءسوز كونفەرەنسياسىندا 11 قاڭتار كۇنى جاريا بولادى. ءبىز وسىمەن 14 رەت وسى ەلدە ءوز ميسسيامىزدى ورىنداپ وتىرمىز، تاجىريبەگە سۇيەنىپ ايتار بولسام، ەلدە بۇل ساياسي ناۋقان زاڭناماعا ساي ءوتىپ كەلدى، – دەدى ول.

دەرەككوز: Baq.kz