دەنساۋلىق ساقتاۋ ءمينيسترى الەكسەي سوي كوروناۆيرۋسقا قارسى ۆاكسينانى نەلىكتەن سالدىرماعانىن ءتۇسىندىردى.
– رەسەيلىك، وتاندىق ۆاكسينانى سالدىرمادىم. ءقازىر سىناقتىڭ قورىتىندىسىن كۇتىپ وتىرمىز. قازاقستاندا رەسمي تۇردە تىركەلىپ، جاپپاي قولدانىسقا ەنگىزىلگەن سوڭ العاشقىلاردىڭ ءبىرى بولىپ ۆاكسينانى سالدىرامىن. رەسەيلىك ۆاكسينا نەمەسە وتاندىق ۆاكسينا ما وندا تۇرعان ەشتەڭە جوق. دەنساۋلىق ساقتاۋ مينيسترلىگىندەگى ارىپتەستەردىڭ جارتىسى وتاندىق ۆاكسينانى، جارتىمىز رەسەيلىك ۆاكسينانى سالدىرتامىز. ياعني ەكى ۆاكسينانىڭ دا ءقاۋىپسىز، ءتيىمدى ەكەنىن كورسەتۋ ءۇشىن. ءبىراق ءبىز ۆاكسينانىڭ رەسمي تىركەۋگە الىنعانىن كۇتىپ وتىرمىز، – دەدى ول.
الەكسەي سوي باسقا مينيسترلەر مەن اكىمدەردىڭ ۆاكسينا سالدىرىپ جاتقانىنا قاتىستى پىكىر ءبىلدىردى.
– ارىپتەستەرىمىزدىڭ ۆاكسينا سالدىرىپ جاتقانى جاقسى. الايدا دەنساۋلىق ساقتاۋ ءمينيسترى ۆاكسينا سالدىرسا، بۇل حالىقتى ەكپە ەگۋگە شاقىرۋ بولىپ سانالادى. دەمەك، ۆاكسينانىڭ ءقاۋىپسىز ءارى ءتيىمدى ەكەنى دالەلدەنگەن دەگەن ءسوز. سوعان بايلانىستى ءبىز مەديسينالىق قىزمەتكەر رەتىندە ۆاكسينانىڭ كەپىلدەنگەن، انىق ناتيجەسىن كۇتۋىمىز قاجەت. ءقازىر كلينيكالىق سىناقتىڭ ءبىرىنشى جانە ەكىنشى فازاسىندا ءقاۋىپسىز ءارى ءتيىمدى دەگەن قورىتىندى شىقتى، – دەپ اتاپ ايتتى مينيستر.
ايتا كەتەيىك، بۇدان الدىن قازاقستاننىڭ ءبىلىم جانە عىلىم ءمينيسترى اسحات ايماعامبەتوۆ، جامبىل وبلىسىنىڭ اكىمى بەردىبەك ساپاربايەۆ، پرەزيدەنت كەڭەسشىسى ەرلان قارين قازاقستاندىق ۆاكسينانى سالدىرعان بولاتىن.
پىكىر قالدىرۋ